قازاقستان ازاماتتارىنا بوتەن ەلدىڭ سوعىسىنا قاتىسقانى ءۇشىن قىلمىستىق جاۋاپكەرشىلىك قاراستىرىلعانىن ەسكەرتتى، دەپ حابارلايدى “ادىرنا” ۇلتتىق پورتالى ءىىم ءباسپاسوز قىزمەتىنە سىلتەپ.
سوڭعى ۋاقىتتا الەۋمەتتىك جەلىلەردە شەتەل مەملەكەتتەرىنىڭ قارۋلى كۇشتەرىمەن كەلىسىمشارتقا وتىرىپ، اقشا تابۋعا شاقىراتىن جارنامالار مەن بەينەروليكتەر تاراپ جاتىر. مينيسترلىك بۇل ارەكەتتەردىڭ زاڭسىز ەكەنىن ەسكەرتەدى.
- 172-باپ — ەگەر قازاقستان ازاماتى شەت مەملەكەتتىڭ اۋماعىندا بولىپ جاتقان سوعىسقا نەمەسە قارۋلى قاقتىعىسقا زاڭسىز قاتىسسا (جالدامالى بولماسا دا), 5 جىلدان 9 جىلعا دەيىن باس بوستاندىعىنان ايىرۋ جازاسى قاراستىرىلعان.
170-باپ – ەگەر ازامات جالدامالى رەتىندە سوعىسقا قاتىسسا، وندا ارەكەتتىڭ اۋىرلىعىنا قاراي 7 جىلدان باستاپ ءومىر بويىنا دەيىن باس بوستاندىعىنان ايىرۋ، سونداي-اق ازاماتتىعىنان ايىرۋ جانە مۇلكىن تاركىلەۋ جازالارى قولدانىلۋى مۇمكىن.
ءىىم ازاماتتاردى قر زاڭناماسىن قاتاڭ ساقتاۋعا جانە اۋىر قۇقىقتىق سالدارعا اكەلەتىن ارەكەتتەردەن اۋلاق بولۋعا شاقىرادى.
