رەسەي پرەزيدەنتى ۆلاديمير پۋتين ازەربايجان پرەزيدەنتى يلحام اليەۆتەن اقتاۋ ماڭىندا بولعان ۇشاق اپاتىنا بايلانىستى كەشىرىم سۇرادى، دەپ حابارلايدى "ادىرنا" ۇلتتىق پورتالى.
بۇل تۋرالى رەسەي سىرتقى ىستەر مينيسترلىگىنىڭ ءباسپاسوز قىزمەتى حابارلادى. مالىمەتتەردە "كەشىرىم سۇراۋ" جايلى ەكىنشى كەزەكتە ايتىلعانى كەلتىرىلگەن.
رەسەي تاراپىنىڭ باستاماسىمەن ەكى ەل باسشىلارى تەلەفون ارقىلى سويلەسكەن. اڭگىمە بارىسىندا ۆلاديمير پۋتين رەسەي اۋە كەڭىستىگىندە ورىن العان قايعىلى وقيعاعا بايلانىستى كەشىرىم سۇراپ، قازا تاپقانداردىڭ وتباسىلارىنا كوڭىل ايتتى جانە زارداپ شەككەندەرگە تەز ساۋىعىپ كەتۋىن تىلەدى.
رەسەي ءسىم مالىمدەمەسىندە باكۋ-گروزنىي باعىتىنداعى ازەربايجان ۇشاعى اقتاۋ اۋەجايى ماڭىندا اپاتقا ۇشىراعانعا دەيىن بىرنەشە رەت گروزنىي اۋەجايىنا قونۋعا تىرىسقانى ايتىلدى. سول ۋاقىتتا گروزنىي، موزدوك جانە ۆلاديكاۆكاز قالالارىنا ۋكراينالىق دروندار شابۋىل جاساعان. رەسەي اۋە قورعانىس جۇيەلەرى بۇل شابۋىلداردى تويتارۋ بارىسىندا جۇمىس ىستەگەن.
رەسەي تەرگەۋ كوميتەتى وقيعا بويىنشا قر قىلمىستىق كودەكسىنىڭ 263-بابىنا سايكەس («اۋە كولىگىنىڭ قوزعالىسى جانە ونى پايدالانۋ قاۋىپسىزدىگى ەرەجەلەرىن بۇزۋ») قىلمىستىق ءىس قوزعادى. ازەربايجان پروكۋراتۋراسىنىڭ ەكى قىزمەتكەرى گروزنىيدا رەسەيلىك پروكۋراتۋرا جانە تەرگەۋ ورگاندارىمەن بىرگە جۇمىس ىستەۋدە.
العاشقى دەرەكتەرگە سايكەس، اپاتتىڭ سەبەبى رەتىندە قۇس ۇشاق قوزعالتقىشىنا كىرىپ كەتۋى مۇمكىن دەگەن بولجام ايتىلعان. بۇل دەرەكتى رەسەي ازاماتتىق اۆياتسيا وكىلى ارتەم كورەنياكو راستاعان.
الايدا، 26 جەلتوقساندا Euronews تەلەارناسى اپاتقا رەسەيلىك اۋە قورعانىس جۇيەسىنىڭ «پانتسير-س» زىمىرانى سەبەپ بولعانى تۋرالى حابارلادى.
28 جەلتوقساندا قازاقستان پرەزيدەنتى قاسىم-جومارت توقاەۆ اقتاۋ ماڭىنداعى ۇشاق اپاتىنا بايلانىستى جەدەل كەڭەس وتكىزدى. پرەزيدەنت وقيعانىڭ بارلىق اسپەكتىلەرىن مۇقيات تەكسەرۋدى تاپسىردى.
ەسكە سالا كەتەيىك، سەنات توراعاسى ماۋلەن اشىمباەۆ بىرنەشە كۇن بۇرىن اۋە اپاتىنىڭ سەبەپتەرى مەن زاقىمدانۋ سيپاتى بەلگىسىز ەكەنىن ايتتى. ول ءوز سوزىندە كەيبىر ادامدار وسى جاعدايدى ءوز مۇددەسىنە پايدالانۋعا تىرىسىپ جاتقانىن اتاپ وتكەن بولاتىن.
"بۇل - الىپقاشپا اڭگىمەلەر، دالەلسىز مالىمدەمەلەر. مۇنداي باعا بەرۋدى قازىر تاراتۋ دۇرىس ەمەس ءارى ەتيكاعا جاتپايدى دەپ ويلايمىن. بۇل، ەڭ الدىمەن، كەيبىر ادامداردىڭ وسى جاعدايدان وزىنە پايدا تۇسىرگىسى كەلەتىنىن، حايپ جاساپ، قارالىم جيناپ، باسقا دا ءوز مۇددەسىن كوزدەيتىنىن كورسەتەدى، – دەگەن ول.
ازەربايجان پارلامەنتىنىڭ دەپۋتاتى راسيم مۇسابەكوۆ بۇل جاعدايعا بايلانىستى رەسەيدىڭ كەشىرىم سۇراۋى ءتيىس ەكەنىن مالىمدەگەن بولاتىن.
اقتاۋ ماڭىنداعى ۇشاق اپاتىنا بايلانىستى رەسەيلىك روساۆياتسيا باسشىسى دميتري يادروۆ بىرەر كۇن بۇرىن بارلىق ءمان-جايىن مۇقيات تەكسەرۋ قاجەتتىگىن ايتىپ، شابۋىلدى مويىنداعان ەدى.
ەسكە سالايىق، 2020 جىلدىڭ 8 قاڭتارىندا تەگەران اۋەجايىنان ۇشىپ شىققان ۋكراينالىق PS752 رەيسى يران اسكەريلەرىنىڭ ەكى زىمىرانىمەن اتىپ ءتۇسىرىلدى. بورتتاعى 176 ادام تۇگەل قازا تاپتى. يران بيلىگى بىرنەشە كۇننەن كەيىن بۇل وقيعانى "ادام فاكتورى" دەپ ءتۇسىندىرىپ، قاتەلىكتى مويىنداپ، كەشىرىم سۇرادى.
يراننىڭ سىرتقى ىستەر ءمينيسترى مۇحاممەد دجاۆاد زاريف اپاتتان قازا تاپقانداردىڭ وتباسىلارىنا كوڭىل ايتتى. بۇل حالىقارالىق قوعامداستىقتىڭ سىندارىنا قاراماستان، ءوز كىناسىن مويىنداۋدىڭ ايقىن مىسالى بولدى.
ال 2014 جىلدىڭ 17 شىلدەسىندە Malaysia Airlines اۋە كومپانياسىنىڭ من17 رەيسى ۋكراينانىڭ شىعىسىندا اپاتقا ۇشىرادى. تەرگەۋلەر ناتيجەسىندە ۇشاقتى رەسەيلىك «بۋك» زىمىران جۇيەسىمەن اتىپ تۇسىرگەنى انىقتالدى. زىمىران رەسەيدىڭ قارۋلى كۇشتەرىنە تيەسىلى بولعان جانە اپات كۇنىندە ۋكرايناعا جەتكىزىلگەن.
بورتتا بولعان 298 ادامنىڭ بارلىعى، ونىڭ ىشىندە 80 بالا مەن 15 ەكيپاج مۇشەسى، قايتىس بولدى. حالىقارالىق تەرگەۋ توبى (JIT) رەسەيدىڭ جاۋاپكەرشىلىگىن اتاپ كورسەتتى. بىراق رەسەي تاراپى بۇل ايىپتاردى جوققا شىعارىپ، وقيعاعا ۋكراينانى كىنالاعان بولاتىن.
