Demoscope قوعامدىق پىكىردى جەدەل مونيتورينگى بيۋروسى جۇرگىزگەن ساۋالناما ناتيجەسىندە قازاقستان ازاماتتارىنىڭ 53,1%-ى ەلدىڭ بىرىڭعاي ۋاقىت بەلدەۋىنە كوشۋىن قولداماعانى انىقتالدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
2024 جىلدىڭ 27 قاراشاسى مەن 11 جەلتوقسان ارالىعىندا جۇرگىزىلگەن ساۋالنامادا ازاماتتاردىڭ وسى رەفورماعا قاتىستى پىكىرى مەن 2024 جىلعى باستى وقيعالارعا باعا بەرۋى زەرتتەلگەن. ساۋالناما ناتيجەسى بويىنشا، بىرىڭعاي ۋاقىت بەلدەۋىن قولدايتىندار 22,1%-دى قۇراسا، 15,5%-ى بەيتاراپ ۇستانىمدا، ال 7,4%-ى بۇل وزگەرىس جايلى بىلمەيتىندەرىن ايتقان.
رەسپوندەنتتەردىڭ رەفورماعا قاتىستى كوزقاراسى ولاردىڭ تۇراتىن ايماعىنا بايلانىستى وزگەرگەن. شىعىس جانە ورتالىق ايماقتاردا – اباي، شىعىس قازاقستان، جەتىسۋ، قاراعاندى، ۇلىتاۋ وبلىستارىندا – تۇرعىنداردىڭ باسىم كوپشىلىگى (74,6%) بىرىڭعاي ۋاقىت بەلدەۋىنە قارسىلىق بىلدىرگەن. الماتىدا – 68,4%، استانادا – 55,7%، ال وڭتۇستىك ايماقتاردا (شىمكەنت، الماتى، جامبىل، قىزىلوردا، تۇركىستان وبلىستارى) 47,8% بۇل شەشىمگە قارسى بولعان. سولتۇستىك ايماقتاردا (اقمولا، قوستاناي، پاۆلودار، سولتۇستىك قازاقستان وبلىستارى) قارسى پىكىر بىلدىرگەندەر ۇلەسى 45,3%-دى قۇرادى.
تەك باتىس وڭىرلەردە (اقتوبە، اتىراۋ، باتىس قازاقستان، ماڭعىستاۋ وبلىستارى) رەفورمانى قولدايتىنداردىڭ ۇلەسى ازداپ باسىم بولعان – 31,8% قولداپ، 30,6% قارسى شىققان.
ازاماتتاردىڭ ەڭ ۇلكەن الاڭداۋشىلىعى تومەن تابىس دەڭگەيى (37,6%), ازىق-تۇلىك باعاسىنىڭ ءوسۋى (28,3%) جانە سىبايلاس جەمقورلىق (26,8%) ماسەلەلەرىنە باعىتتالعان. ودان بولەك، سۋ تاسقىنى، جەر سىلكىنىسى ماسەلەلەرى تاعى بار.
Demoscope زەرتتەۋى قازاقستاندىقتاردىڭ ءومىر ءسۇرۋ دەڭگەيى مەن الەۋمەتتىك ماسەلەلەرگە قاتىستى سىن كوزقاراسىنىڭ وسكەنىن كورسەتتى.
