تاۋەلسىزدىك كۇنى قارساڭىندا الماتى وبلىسىنىڭ رايىمبەك اۋدانىندا جاستار ءۇشىن ارنايى بوي كوتەرگەن كوۆوركينگ ورتالىق قولدانىسقا بەرىلدى.
بۇل اۋدان حالقىنىڭ ۇشتەن ءبىرىن قۇرايتىن رايىمبەك جاستارى ءۇشىن كوپتەن كۇتكەن قۋانىشتى وقيعا بولدى. زاماناۋي نىسان جاستاردىڭ جان-جاقتى دامۋىنا، بوس ۋاقىتىن ءتيىمدى وتكىزۋىنە، قاجەتتى اقپارات الۋىنا مۇمكىندىك بەرەتىن ورتالىققا اينالماق.
سونداي-اق، جاستارعا بىلىكتى ماماندار پسيحولوگيالىق جانە زاڭگەرلىك كومەك، قارجىلىق ساۋاتتىلىق بويىنشا كەڭەس بەرىپ، جۇمىسقا ورنالاسۋىنا قولداۋ كورسەتەدى.
ايتا كەتۋ كەرەك، جاستار ورتالىقتارى جىل باسىنان بەرى وبلىس اكىمىنىڭ قولداۋىمەن قوناەۆ قالاسىندا جانە بالقاش، كەگەن اۋدانىندا ىسكە قوسىلدى، كەلەر جىلى قاسكەلەڭ قالاسىندا اشىلادى.
«قازىر الماتى وبلىسىندا 14 پەن 35 جاس ارالىعىنداعى 420 مىڭنان استام جاس تۇرادى. بىراق جاستار ءۇشىن باس قوسىپ وي بولىسەتىن، قيىن كەزدە كومەك كورسەتەتىن ورتالىق وبلىس ايماعىندا بولعان ەمەس. ءبىز قازىر بۇل ماسەلەنى جۇيەلى جانە كەزەڭ-كەزەڭىمەن شەشىپ جاتىرمىز. الداعى ۋاقىتتا ءبىز وبلىستىڭ باسقا اۋداندارىندا جاستار ءۇشىن زاماناۋي ينفراقۇرىلىم قۇرۋعا تىرىسامىز. بۇل ءوز كەزەگىندە جاستارمەن جۇيەلى جۇمىس جۇرگىزۋگە ىقپال ەتەدى»، - دەدى وبلىستىق جاستار ساياساتى ماسەلەلەرى جونىندەگى باسقارما باسشىسى ءمادي احمەتوۆ.
كوۆوركينگ ورتالىقتار وڭىردەگى جاستاردى الەۋمەتتەندىرۋدىڭ ماڭىزدى قۇرالىنا اينالىپ كەلەدى. جاستاردىڭ جاڭا الاڭىندا تەگىن نەگىزدە بيزنەس-ترەنينگتەر، شەبەرلىك ساباقتارى، كەزدەسۋلەر، كورمەلەر، ۇيىرمەلەر جانە باسقا دا ءىس-شارالار وتكىزۋ جوسپارلانۋدا.
