گرۋزيا پوليتسياسى تبيليسيدەگى پارلامەنت عيماراتى الدىندا جينالعان دەمونسترانتتاردى تاراتىپ جىبەردى. ولار ەۋروپا وداعىنا مۇشە بولۋعا قاتىستى كەلىسسوزدى 2028 جىلعا دەيىن شەگەرۋ تۋرالى پرەمەر-مينيستر يراكلي كوباحيدزەنىڭ شەشىمىنە قارسى. بۇل تۋرالى Anadolu اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، كەيبىر نارازىلىق بىلدىرۋشىلەر پارلامەنت عيماراتىنىڭ ەسىگىن قورعاۋ ءۇشىن ورناتىلعان مەتالل قورشاۋدى بۇزۋعا تىرىسىپ، سول جاققا ءارتۇرلى زاتتار لاقتىرعان.
پوليتسيا مەن عيماراتتىڭ ءبىر بولىگىن باسىپ الماق بولعان دەمونسترانتتار اراسىندا قاقتىعىستار ورىن الدى.
گرۋزيانىڭ ىشكى ىستەر مينيسترلىگىنە قاراستى كۇشتىك قۇرىلىمدار نارازىلىقتى تاراتۋ ءۇشىن سۋ اتقىشتاردى قولدانعان.
نارازىلىق بىلدىرۋشىلەر ءتارتىپ ساقشىلارىنا ءارتۇرلى زاتتار لاقتىرعاننان كەيىن پوليتسيا كوزدەن جاس اعىزاتىن گاز قولداندى.
پوليتسيانىڭ ارالاسۋىنان كەيىن اكتسياعا قاتىسۋشىلار شەگىنىپ، پارلامەنت عيماراتىنا جاقىن ورنالاسقان شوتا رۋستاۆەلي داڭعىلىن بارريكادالارمەن جاۋىپ تاستاعان.
جەرگىلىكتى باق-تىڭ حابارلاۋىنشا، تارتىپسىزدىكتەر كەزىندە بىرنەشە ادام ۇستالعان. شوتا رۋستاۆەلي كوشەسىندە پوليتسيا مەن دەمونسترانتتار اراسىنداعى قاقتىعىستار ءالى دە جالعاسۋدا.
ايتا كەتسەك، گرۋزيا پرەمەر-ءمينيسترى يراكلي كوباحيدزە 28 قاراشادا ەل 2028 جىلعا دەيىن ەۋروپا وداعىنا كىرۋ تۋرالى كەلىسسوزدەردى باستاۋ ماسەلەسىن كۇن تارتىبىنە قويمايتىنىن مالىمدەدى.
ونىڭ ايتۋىنشا، گرۋزيا 2030 جىلعا قاراي ەۋروپا وداعىنا مۇشە بولۋدى ماقسات ەتىپ وتىر، بىراق بۇل جول قوسىمشا كۇش پەن ۋاقىتتى قاجەت ەتەدى.
سونداي-اق، كوباحيدزە كەيبىر ەۋروپالىق ساياساتكەرلەردى گرۋزيانىڭ ىشكى ىستەرىنە ارالاستى دەپ ايىپتاپ، سوڭعى ءۇش جىلدا ەۋروپا پارلامەنتى قابىلداعان شەشىمدەردى گرۋزين قوعامى مەن ەۋروپالىق ينستيتۋتتاردىڭ قابىلداماعانىن اتاپ ءوتتى.
كوباحيدزە گرۋزيا 2028 جىلعا دەيىن ەۋروپا وداعىنان كەز كەلگەن قارجىلىق گرانتتاردى قابىلداۋدان باس تارتاتىنىن مالىمدەدى. ول ەلدىڭ ەو-عا «جالبارىنىپ» ەمەس، مىقتى ەكونوميكاسى مەن تۇراقتى دەموكراتياسىمەن ابىرويمەن كىرەتىنىن ايتتى.
ەۋروپا پارلامەنتى 28 قاراشادا جاريالانعان مالىمدەمەسىندە 26 قازاندا وتكەن پارلامەنت سايلاۋىنىڭ ناتيجەلەرىنە الاڭداۋشىلىق ءبىلدىرىپ، سايلاۋ ناتيجەلەرىن حالىقارالىق باقىلاۋ اياسىندا قايتا قاراۋعا شاقىردى.
ەۋروپا دەپۋتاتتارى دەموكراتيالىق ستاندارتتاردى السىرەتۋگە جاۋاپتى گرۋزين شەنەۋنىكتەرىنە قارسى سانكتسيالار ەنگىزۋگە جانە گرۋزيا ۇكىمەتىمەن رەسمي بايلانىستاردى شەكتەۋگە شاقىردى.
ەسكە سالساق، گرۋزيا ەۋروپا وداعىنا مۇشەلىككە ءوتىنىشىن 2022 جىلعى ناۋرىزدا بەرگەن جانە سول جىلدىڭ جەلتوقسانىندا كانديداتتىق مارتەبەگە يە بولدى.
الايدا، شىلدە ايىندا شەتەلدىك ىقپالدىڭ «اشىقتىعى» تۋرالى داۋلى زاڭ قابىلدانعاننان كەيىن بۇل پروتسەسس توقتاتىلدى.
26 قازانداعى سايلاۋدا 53,93 % داۋىس جيناعان «گرۋزيا ارمانى» بيلەۋشى پارتياسى جەڭىسكە جەتتى.
پرەزيدەنت سالومە زۋرابيشۆيلي مەن وپپوزيتسيالىق كۇشتەر ۇكىمەتتى سايلاۋ ناتيجەلەرىن بۇرمالادى دەپ ايىپتاپ، ونىڭ ناتيجەلەرىن مويىنداۋدان باس تارتتى. 19 قاراشادا پرەزيدەنت كونستيتۋتسيالىق سوتقا سايلاۋ ناتيجەلەرىن جويۋدى سۇراپ جۇگىندى.
ءوز كەزەگىندە پرەمەر-مينيستر كوباحيدزە سايلاۋدىڭ دەموكراتيالىق وتكەنىن ايتىپ، وپپوزيتسيانى ەلدە تۇراقسىزدىق تۋعىزۋعا تىرىسۋدا دەپ ايىپتادى.
