بۇگىن – رەسپۋبليكا كۇنى. بۇل داتا 1990 جىلى قازاق كسر جوعارعى كەڭەسىنىڭ «قازاق كسر-ءنىڭ مەملەكەتتىك ەگەمەندىگى تۋرالى» دەكلاراتسيانى قابىلداعان كۇنمەن تىكەلەي بايلانىستى، دەپ حابارلايدى “ادىرنا” ۇلتتىق پورتالى.
سوۆەت وداعى قۇرامىنداعى قازاقستان 1990 جىلعى 25 قازاندا «قازاق سسر-ءىنىڭ مەملەكەتتىك ەگەمەندىگى تۋرالى دەكلاراتسيا» قابىلدادى. وندا «قازاق سوۆەتتiك سوتسياليستiك رەسپۋبليكاسى - ەگەمەندi مەملەكەت، ول باسقا رەسپۋبليكالارمەن ەگەمەندi رەسپۋبليكالار وداعىنا ەرiكتi تۇردە بiرiگەدi جانە ولارمەن ءوزارا قاتىناستارىن شارتتىق نەگiزدە قۇرادى» دەپ اتاپ كورسەتىلدى.
قۇجاتتا «قازاق سسر-ءىنىڭ وداقتان ەركiن شىعۋ پراۆوسىن وزiندە ساقتاپ قالاتىنى» ايتىلعان. دەكلاراتسيا بويىنشا، قازاق سسر-ءىنىڭ مەملەكەتتiك وكiمەت بيلiگi «رەسپۋبليكا iشiندە، سونداي-اق وداقتىق شارتتا بەلگiلەنگەن شەڭبەردە» دەربەس، تولىق بولۋعا ءتيىس ەدى. دەگەنمەن وندا كەيبىر وكىلەتتىكتىڭ ماسكەۋدەگى ورتالىقپەن اقىلداسىپ شەشىلەتىنى دە اتاپ كورسەتىلگەن. «قازاق سسر باس پروكۋرورىنىڭ كانديداتۋراسىن رەسپۋبليكا پرەزيدەنتi سسرو باس پروكۋرورىمەن كەلiسە وتىرىپ ۇسىنادى جانە قازاق سسر جوعارعى سوۆەتi بەكiتەدi» دەلىنگەن قۇجاتتا.
قازاق سسر-ءىنىڭ مەملەكەتتىك ەگەمەندىگى تۋرالى دەكلاراتسياسى قابىلدانعان كۇن، 25 قازان كەيىن 1995 جىلى 18 قازاندا «رەسپۋبليكا كۇنى» رەتىندە اتالدى. 2001 جىلى قابىلدانعان زاڭ بويىنشا 25 قازان مەملەكەتتىك مەرەكەلەر قاتارىنا قوسىلدى. 2009 جىلى «قازاقستان رەسپۋبليكاسىنداعى مەرەكەلەر تۋرالى» قولدانىستاعى زاڭعا وزگەرىستەر ەنگىزىلىپ، رەسپۋبليكا كۇنى اتاۋسىز قالدى.
2022 جىلى رەسپۋبليكا كۇنى ۇلتتىق مەرەكە رەتىندە قايتادان اتالىپ وتە باستادى، ال 16 جەلتوقسان ادەتتەگىدەي تاۋەلسىزدىك كۇنى بولىپ قالدى.
