ۋكراينا پرەزيدەنتى ۆلاديمير زەلەنسكي بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش شاقىرعان ەكى كۇندىك «بولاشاق ءسامميتى» بارىسىندا ءسوز سويلەدى، دەپ حابارلايدى “ادىرنا” ۇلتتىق پورتالى.
ءوز سوزىندە زەلەنسكي رەسەيدىڭ اعىمداعى ءسامميتتىڭ جۇمىسىنا قارسىلىق كورسەتۋ ارەكەتىن اتاپ ءوتىپ، بولاشاق پاكتىنىڭ قابىلدانۋىنا ۇلەس قوسقان ەلدەرگە العىسىن ءبىلدىردى. ول ۋكراينانىڭ سوعىستى توقتاتۋ ءۇشىن جاساپ جاتقان قادامدارى: بەيبىتشىلىك فورمۋلاسى، حالىقارالىق بەيبىتشىلىك ءسامميتى جانە ەكىنشى بەيبىتشىلىك سامميتىنە دايىندىق تۋرالى ايتتى.
سوڭىندا ۋكراينا پرەزيدەنتى: «پۋتين كوپ نارسەنى ۇرلادى، بىراق ول ەشقاشان بۇكىل الەمنىڭ بولاشاعىن ۇرلاي المايدى» دەدى.
ءبىر كۇن بۇرىن بۇۇ باس اسسامبلەياسى 21 عاسىر سىن-قاتەرلەرىن شەشۋ ءۇشىن الەم ەلدەرىن بىرىكتىرۋ جوسپارىن بەكىتتى. بۇل سىن-قاتەرلەر كليماتتىڭ وزگەرۋى مەن جاساندى ينتەللەكتتەن باستاپ قاقتىعىستاردىڭ كۇشەيۋىنە جانە تەڭسىزدىك پەن كەدەيلىكتىڭ ارتۋىنا دەيىن سوزىلادى.
«بولاشاق پاكتىسى» دەپ اتالاتىن 42 بەتتەن تۇراتىن قۇجات بۇۇ-عا مۇشە 193 ەلدىڭ باسشىلارىن پلانەتانى وزگەرتەتىن ناقتى ارەكەتتەرگە اينالدىرۋعا شاقىرادى. ماقسات – حالىقارالىق بەيبىتشىلىك پەن قاۋىپسىزدىكتى ىلگەرىلەتۋ، ينكليۋزيۆتى قوعامداردىڭ دامۋىنا جاردەمدەسۋ جانە تەحنولوگيانىڭ جالپى ادامزات يگىلىگىنە قىزمەت ەتۋىن قامتاماسىز ەتۋ.
پاكت 22 قىركۇيەكتە ەكى كۇندىك «بولاشاق ءسامميتىنىڭ» اشىلۋىندا قابىلداندى. ول سونىمەن قاتار جاھاندىق تسيفرلىق شارت پەن بولاشاق ۇرپاق تۋرالى دەكلاراتسيامەن بىرگە جۇرەدى. ءبىرىنشىسى تسيفرلىق تەحنولوگيالار مەن ولاردىڭ قولدانىلۋىنا قاتىستى بولسا، ەكىنشىسى ەلدەردى ءوز ۇرپاقتارىن ءتۇرلى اپاتتاردان قۇتقارۋ ءۇشىن مىندەتتەمەلەر الۋعا شاقىرادى.
قۇجاتتى قابىلداۋعا رەسەي، سونداي-اق سولتۇستىك كورەيا، نيكاراگۋا، سيريا، سۋدان، يران جانە بەلارۋس قارسى بولدى. رەسەي جاھاندىق وڭتۇستىك ەلدەرىن ۇجىمدىق باتىستىڭ ارالاسۋىنان قورعاۋ ءۇشىن قۇجاتقا تۇزەتۋلەر ەنگىزۋگە تىرىستى.
ۆلاديمير زەلەنسكي ءبىر كۇن بۇرىن اقش-قا كەلدى. بولاشاق ءسامميتى اياسىندا ول الەم كوشباسشىلارىمەن، اتاپ ايتقاندا گەرمانيا كانتسلەرى ولاف شولتسپەن كەزدەسۋلەر وتكىزەدى. الدا ول اقش پرەزيدەنتى دجو بايدەنمەن جانە ەكى پارتيانىڭ پرەزيدەنتتىككە ۇمىتكەرلەرىمەن كەزدەسەدى دەپ جوسپارلانعان. زەلەنسكي ولارعا بەس تارماقتان تۇراتىن «جەڭىس جوسپارىن» ۇسىنۋعا ۋادە بەردى.
