بەلارۋس پرەزيدەنتى الەكساندر لۋكاشەنكونىڭ مالىمدەمەسىنەن كەيىن قازاقستاننىڭ سىرتقى ىستەر مينيسترلىگى ء(سىم) بەلارۋس ەلشىسى پاۆەل ءۋتيۋپيندى شاقىرتىپ، وعان پرەزيدەنت قاسىم-جومارت توقاەۆتىڭ سىرتقى ساياسي باعىتىنىڭ تيىمدىلىگىن ءتۇسىندىردى، دەپ حابارلايدى "ادىرنا" ۇلتتىق پورتالى.
مينيستر قازاقستاننىڭ بۇۇ جارعىسىنا جانە حالىقارالىق قۇقىقتىڭ نەگىزىن قالاۋشى نورمالارىنا سايكەس تەڭگەرىمدى جانە بەيبىت سىرتقى ساياسات جۇرگىزىپ جاتقانىن اتاپ ءوتتى. سونىمەن بىرگە ەلىمىزدىڭ مەملەكەتتەر اراسىنداعى بارلىق كەلىسپەۋشىلىكتى ساياسي جانە ديپلوماتيالىق جولدارمەن شەشۋدى دۇرىس سانايتىنىن جەتكىزگەن.
«قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋدىڭ بەلارۋس رەسپۋبليكاسىنىڭ ەلشىسى پاۆەل ۋتيۋپينمەن كەزدەسۋى بارىسىندا قازاقستان-بەلارۋس ەكىجاقتى دەڭگەيدەگى، سونداي-اق كوپجاقتى ۇيىمدار شەڭبەرىندەگى ىنتىماقتاستىقتىڭ وزەكتى ماسەلەلەرى تالقىلاندى. اتاپ ايتقاندا، مينيستر قازاقستان بۇۇ جارعىسىنا جانە حالىقارالىق قۇقىقتىڭ نەگىزىن قالاۋشى نورمالارىنا سايكەس تەڭگەرىمدى جانە بەيبىتشىل سىرتقى ساياسات جۇرگىزىپ جاتقانىن ەرەكشە اتاپ ءوتتى. ەلىمىز مەملەكەتتەر اراسىنداعى بارلىق كەلىسپەۋشىلىكتەر ساياسي جانە ديپلوماتيالىق جولدارمەن شەشىلۋى ءتيىس ەكەنىنە نىق سەنىمدى. قازىرگى گەوساياسي جاعدايدا مەملەكەت باسشىسى جۇرگىزىپ جاتقان ەلىمىزدىڭ سىرتقى ساياسي باعىتى ءوزىنىڭ تيىمدىلىگىن كورسەتتى" دەلىنگەن مينيسترلىك مالىمدەمەسىندە.
ايتا كەتسەك، بىرنەشە كۇن بۇرىن بەلارۋس پرەزيدەنتى الەكساندر لۋكاشەنكو «روسسيا» تەلەارناسىنا بەرگەن سۇحباتىندا پوستكەڭەستىك كەڭىستىكتەگى كەيبىر ەلدەردى رەسەيگە «تۇتىنۋشىلىق كوزقاراس ۇستانادى» دەپ ايىپتادى.
ول رەسەي مەنە بەلارۋستىڭ ءبىر قايىقتا وتىرعانىن ايتقان.
«ەگەر قايىق اۋدارىلىپ كەتسە، رەسەي دە، بەلارۋس تە سۋعا باتىپ كەتەدى. ءبىز كەيبىر پوستكەڭەستىك مەملەكەتتەرىمىز سياقتى ابىگەرگە ءتۇسىپ جاتقان جوقپىز. ولار رەسەيدەن بىردەڭە العىلارى كەلەدى، بىراق ورنىنا ەشتەڭە بەرمەيدى»، – دەپ سىنادى لۋكاشەنكو.
