باتىس قازاقستان وبلىسىنىڭ سىرىم اۋدانى تاسقىن سالدارىنان ەداۋىر شىعىنعا ۇشىراعان ەدى. بۇگىندە اۋداننان تۇلەپ ۇشقان ستۋدەنت جاستار تۋعان اۋىلىن قايتا قالپىنا كەلتىرۋگە، زارداپ شەككەن تۇرعىندار ءۇشىن باسپانا سالۋعا اتسالىسۋدا. قازىرگى تاڭدا جىمپيتى، بۇلدىرتى، ولەڭتى جانە كوزدىعارا اۋىلدارىندا ءۇيى تاسقىنننان 114 جاڭا ءۇي بوي كوتەرۋدە.
قۇرىلىس جاساعىنداعى 50 ستۋدەنت جاز بويى قونىستويدى جاقىنداتۋعا ۇلەس قوسپاق.
اۋىلداعى ستۋدەنتتەر مەن جۇمىسسىز جاستار ءۇشىن يگىلىكتى جوبانى ۇسىنعان – «اۋىل» حالىقتىق-دەموكراتيالىق پاتريوتتىق پارتياسى.
بۇگىن جىمپيتىدا ەڭبەك ساربازدارىن سالتاناتتى قاتارعا قابىلداۋ شاراسى ءوتتى. جاس قۇرىلىسشىلار سالتاناتتى جيىننان كەيىن تىكە قۇرىلىس نىساندارىنا اتتانىپ، جۇمىس كۇنىن باستاپ تا كەتتى. ستۋدەنت جاستار «پروفلاين»، «JSGroup»، «قالدىعايتى» جشس مەردىگەر كومپانيالارى ارقىلى جۇمىسقا ورنالاسىپ جاتىر.
- توتەنشە جاعداي جاريالانعان كۇننەن باستاپ وڭىرلىك پارتيا فيليالىنىڭ ۇجىمى جانە «اۋىل جاستارى» قاناتىنىڭ 70 - تەن استام ەرىكتىلەرى بوگەت جۇمىستارىن جۇرگىزۋگە، اپات سالدارىن جويۋعا بارىنشا اتسالىستى. پارتيا تاراپىنان ەرىكتىلەر قۇرامى جاساقتالىپ، كەڭ كولەمدە گۋمانيتارلىق كومەك ۇيىمداستىرىلدى. ءبىزدىڭ جاستارىمىزدىڭ باستاماسىمەن وڭىرىمىزگە ەكى جۇك كولىگىمەن 25 توننادان استام گۋمانيتارلىق كومەك جەتكىزىلىپ، سۋ تاسقىنىنان زارداپ شەككەن تۇرعىندارعا تاراتىلدى. - دەيدى «اۋىل» پارتياسى جاستار قاناتىنىڭ توراعاسى داۋرەن راحىمبەك.
- “اۋىل” پارتياسىنىڭ جاڭا جوباسىنىڭ سىرىم اۋدانىندا باستاۋ العانىنا قۋانىشتىمىز. بۇل جوبا جاستاردى ەڭبەككە باۋلىپ، حالىقتىڭ مۇڭ-مۇقتاجىن ىشتەن سەزىنىپ، وتانعا دەگەن سۇيىسپەنشىلىكتەرىنىڭ ارتا تۇسۋىنە وڭىنان اسەر ەتەدى دەپ سەنەمىن. باسپاناسىز قالعان ازاماتتار جىلى ۇيالارىمەن تەزىرەك قاۋىشۋىنا تىلەكتەسپىز. حالقىمىزدىڭ ءار ازاماتى قولىنان كەلگەنشە وسى جولدا قىزمەت ەتسىن! - دەدى اۋدان اكىمى جۇماگەلدى باتىرنيازوۆ.
ايتا كەتەيىك، “اۋىل” پارتياسىنىڭ جانىنداعى جاستار قاناتى توتەنشە جاعداي ۋاعىندا حالىقپەن بىرگە بولدى.
