بقو قىلمىستىق ىستەر جونىندەگى مامانداندىرىلعان اۋدانارالىق سوتى 2024 جىلى 5 ماۋسىمدا كولىك ۇرلاۋ جانە 12 جاستاعى قىزدى توپتىق زورلاۋ ايىبى بويىنشا بەس ادامعا قاتىستى ۇكىم شىعاردى، دەپ حابارلايدى “ادىرنا” ۇلتتىق پورتالى.
سوت 2023 جىلدىڭ 23 مامىرىندا سوتتالۋشىلاردىڭ ءبىرى "لادا" اۆتوكولىگىن زاڭسىز يەمدەنگەنىن انىقتادى. ءبىر اپتادان كەيىن ول Hyundai اۆتوكولىگىن ەسىگىن بۇزىپ، كولىكتىڭ ىشىندەگى اقشانى ۇرلاپ، يەسىنە 1 ميلليون تەڭگەدەن استام شىعىن كەلتىرگەن. 10 ماۋسىم كۇنى تاعى ەكى ايىپتالۋشى فولكسۆاگەن كولىگىنە كىرىپ، كولىك ىشىنەن ۇيالى تەلەفونى ۇرلاپ كەتكەن. كەلەسى كۇنى ايىپتالۋشى توپ كامەلەتكە تولماعان قىزدى زورلاعان.
سوتتىڭ مالىمەتىنشە، سوتقا تارتىلعانداردىڭ تورتەۋى - كامەلەتكە تولماعاندار.
«سوتتالۋشىلاردىڭ كىناسى سوتقا دەيىنگى تەرگەپ-تەكسەرۋ بارىسىندا بەرگەن ايعاقتارىمەن، جابىرلەنۋشىلەر مەن كۋالاردىڭ ايعاقتارىمەن، وقيعا بولعان جەردى قاراۋ، بەتتەستىرۋ حاتتامالارى، تەرگەۋ ارەكەتتەرىن جۇرگىزۋ كەزىندە كامەلەتكە تولماعانداردان جاۋاپ الۋ حاتتامالارىمەن دالەلدەندى»، – دەدى سوت.
سوتتالۋشىلار ءوز كىنالارىن مويىندامادى.
سوت باستى ايىپتالۋشىنى 20 جىلعا باس بوستاندىعىنان ايىردى. تاعى ەكەۋى 7, 6 جىل جازا الدى. تاعى ەكەۋى 8 جىلعا باس بوستاندىعىنان ايىرىلدى.
بۇعان دەيىن ورالدا 16-17 جاس ارالىعىنداعى ءتورت ءجاسوسپىرىم مەن 20 جاستاعى جىگىتكە قاتىستى سوت پروتسەسى ءوتىپ جاتقانى حابارلانعان بولاتىن. ولار 12 جاستاعى قىزدى زورلادى دەگەن ايىپپەن، ءبىر جىلعا جۋىق ۋاقىت بۇرىن ۇستالعان.
پروكۋرور كۇدىكتىلەردىڭ كىناسى دالەلدەنگەنىن ايتتى.
الايدا جابىرلەنۋشى دەپ تانىلعان 12 جاستاعى قىزدىڭ اناسى سوتتالۋشىلاردى اقتاۋدى سۇرادى. ول قىزىنىڭ وتىرىك ايتقانىن، زورلانباعانىن ايتادى.
