رەسپۋبليكالىق "تازا قازاقستان" اكتسياسى شىمكەنت قالاسىندا قارقىندى جالعاسۋدا. قالاداعى بارلىق اۋداندار اياسىندا تازالىق شارالارى جان- جاقتى جۇزەگە اسىرىپ جاتىر.
ايتالىق، قالاداعى اباي اۋدانىندا بىرقاتار ەكولوگيالىق شارالار جۇزەگە اسىرىلدى. وسى اۋدان پۋماعىنداعى تەمىرلان تاس جولىندا ورنالاسقان سكۆەردە تازالىق جۇمىستارى ۇيىمداستىرىلدى. تازالىق ءىس-شاراسىنا جالپى 100-دەن استام اۋدان تۇرعىندارى، كاسىپكەرلەر، زيالى قاۋىم وكىلدەرى، بەلسەندى جاستار، ەرىكتىلەر قاتىستى. «تازالىق - دەنساۋلىق كەپىلى» دەگەن ۇستانىممەن وتكەن ءىس-شارادا اعاش كەسۋ، اكتەۋ، ءشوپ ورۋ، سۋعارۋ، قوقىستاردان تازارتۋ جۇمىستارى جۇرگىزىلدى.
«مەملەكەت باسشىسى تاپسىرماسىمەن «تازا قازاقستان» ەكولوگيالىق اكتسياسى باستالعاننان بەرى اۋدان تۇرعىندارى كۇن سايىن ءوزى تۇراتىن كوشە بويىنداعى ارىقتاردى، جول جيەكتەرىن قوقىستان تازارتىپ، بەلسەندى قاتىسۋدا»، - دەيدى قىزىلجار شاعىناۋدانىنىڭ ارداگەرلەر كەڭەسىنىڭ توراعاسى باستارحان بايجانوۆ.
قالا – ورتاق ءۇيىمىز. سوندىقتان، ونىڭ كوركەيىپ، گۇلدەنۋىنە ءاربىر تۇرعىن بەي-جاي قاراماي، قوقىس-قالدىقتاردى كەز كەلگەن جەرگە لاقتىرماي، تازا ۇستاۋعا ات سالىسۋى قاجەت.
اباي اۋدانى كولەمىندە جۇرگىزىلىپ جاتقان تازالىق جۇمىستارىنا بارلىق مەكەمە قىزمەتكەرلەرى ءبىر كىسىدەي اتسالىسىپ، ءاربىر ۇجىم بولىنگەن اۋماقتاردا، كوشەلەردە تازالىق جۇمىستارىن قارقىندى جۇرگىزۋدە.
«تابيعاتتى تازا ۇستاۋ، قورشاعان ورتانىڭ تازالىعىنا جاۋاپكەرشىلىكپەن قاراۋ ول سىزبەن ءبىزدىڭ باستى مىندەتىمىز. وسى رەتتە، بارشا تۇرعىنداردان ەڭبەكتى باعالاۋدى، كولىكتە، كوشەدە جۇرگەندە بەي-بەرەكەت قوقىس تاستاماۋدى سۇرايمىز»، - دەدى شىمكەنت قالاسىنىڭ ايەلدەر ىستەرى جونىندەگى گەندىرلىك كوميسسيانىڭ مۇشەسى، قوعام بەلسەندىسى تادجيباەۆا ورىنشا.
اباي اۋدانىندا وتكەن تازالىق ءىس-شاراسىنا 250-دەن اسا ادام قاتىستى. بۇل شارا تۇرعىنداردىڭ تابيعاتقا دەگەن جاقسى قارىم-قاتىناسىن قالىپتاستىرۋعا جانە قالانىڭ سانيتارلىق جاعدايىن جاقسارتۋعا باعىتتالدى.
ال، شىمكەنت قالاسىنىڭ ءال-فارابي اۋدانىنا قاراستى ءا.جانگەلدين كوشەسى بويىنداعى №28, 30, 32 كوپ قاباتتى تۇرعىن ءۇي تۇرعىندارى دا مەملەكەت باسشىسى ق.توقاەۆتىڭ «تازا قازاقستان» اكتسياسى اياسىندا وتكىزىلىپ جاتقان تازالىق جۇمىستارىنا بەلسەندىلىك تانىتتى.
تۇرعىندار «تازالىق – دەنساۋلىق كەپىلى» دەگەن ۇراندى ۇستانىپ، ءوز اۋلالارىنداعى اعاشتاردىڭ تۇپتەرىن اكتەۋ، ارتىق وسكەن بۇتالاردى قىرقۋ، شوپتەردى ورۋ، يرريگاتسيالىق ارىقتاردى كۇل-قوقىستان تازالاۋ جانە ويىن الاڭشالارى مەن ورىندىقتاردى سىرلاۋ جۇمىستارىن جۇرگىزدى.
تازالىق جۇمىستارىنا تۇرعىندارمەن بىرگە اۋداننىڭ ارداگەرلەرى، بەلسەندى جاستارمەن قاتار كوممۋنالدىق قىزمەتكەرلەر بارلىعى 200-دەن استام ادام اتسالىستى.
ءىس-شاراعا قاتىسقان اۋداندىق ارداگەرلەر كەڭەسىنىڭ توراعاسى يسامۋدين ناشتايۇلى پرەزيدەنتىمىزدىڭ «تازا قازاقستان» اكتسياسىنىڭ ناۋقاندىق ءىس-شارا ەمەستىگىن، بۇعان ءاربىر قالا تۇرعىنى بەي-جاي قاراماي تازالىق مادەنيەتىنىڭ وزىمىزدەن باستاۋ قاجەت ەكەنىن ايتتى. سونداي-اق تۇرعىنداردى ءوز اۋلالارىن تازا ۇستاۋعا، جاستاردىڭ تازالىق مادەنيەتىن ساقتاۋعا باسا نازار اۋدارۋ قاجەت ەكەنىن جەتكىزدى.
