سىبايلاس جەمقورلىققا قارسى قىزمەت جانجالدى «ايكا ءتىزىمىنىڭ» تارالۋىنا قاتىستى قىلمىستىق ءىستى تەرگەپ جاتىر. بۇل تۋرالى ىشكى ىستەر ۆيتسە-ءمينيسترى مارات قوجاەۆ ايتتى، دەپ حابارلايدى “ادىرنا” ۇلتتىق پورتادى.
«وسى فاكتى بويىنشا «انتيكور» قىلمىستىق ءىستى تەرگەۋدى جالعاستىرۋدا، سوندىقتان مەن ازىرگە تۇسىنىكتەمە بەرە المايمىن، تەرگەۋ ءالى اياقتالعان جوق»، - دەدى قوجاەۆ سارسەنبى كۇنى ءماجىلىس سىرتىندا.
سونداي-اق ول VIP سۋتەنەر ءىسى بويىنشا تىكەلەي ينتيمدىك قىزمەت كورسەتكەن تۇلعالار اكىمشىلىك جاۋاپكەرشىلىككە تارتىلىپ جاتقانىن ايتتى.
بۇل رەتتە ىشكى ىستەر مينيسترلىگى باسشىسىنىڭ ورىنباسارى ينتيمدىك قىزمەت كورسەتۋ سالاسىنداعى كليەنتتەردى جاۋاپكەرشىلىككە تارتۋعا قاتىستى ساۋالعا جاۋاپ بەردى. اتاپ ايتقاندا، جۋرناليستەر ءمينيستردىڭ ورىنباسارىنان ەسكورت كليەنتتەرىن جازالاۋ يدەياسىن قولدايدى ما، سۇراپ كوردى.
«جەكە مەن ونى قولدايمىن»، - دەدى قوجاەۆ.
ەسكە سالايىق، 2023 جىلدىڭ 6 ماۋسىمىندا ءىىم الماتىدا الەۋمەتتىك جەلىلەر ارقىلى اينالىمى 209 ميلليون تەڭگەدەن اساتىن ەليتالىق ەسكورت قىزداردىڭ «جابىق» الەۋمەتتىك جەلىلەرى جويىلعانىن حابارلاعان بولاتىن. ولار الماتىدا تەك اۋقاتتى ەركەكتەرگە ينتيمدىك قىزمەت كورسەتىپ، ارنايى كەشتەرى ۇيىمداستىرعان.
ءىس بويىنشا باستى ايىپتالۋشى 25 جاستاعى الماتىلىق ايەل. ول تەرگەۋشىلەردىڭ ايتۋىنشا، اقشا ءۇشىن جىنىستىق قىزمەت كورسەتۋگە دايىن مودەل قىزداردى تاڭداعان، سونىمەن قاتار اۋقاتتى كليەنتتەردى ىزدەگەن. ءتارتىپ ساقشىلارى اتاپ وتكەندەي، سەكسۋالدىق بيزنەستى ۇيىمداستىرۋشى ءوزىنىڭ ينتەرنەتتەگى قىزمەتىن مۇقيات بۇركەگە جانە Instagram الەۋمەتتىك جەلىسىندە ءوزىن تابىستى مودەل جانە بلوگەر رەتىندە كورسەتە وتىرىپ، 100 مىڭنان استام اۋديتورياعا يە بولعان.
سونىمەن بىرگە، پوليتسيا ءتىنتۋ ناتيجەسىندە كۇدىكتىدەن قىلمىستىق «بيزنەس» تۋرالى جازبالار جازىلعان كۇندەلىك تاركىلەنگەنىن حابارلادى.
2023 جىلدىڭ 1 جەلتوقسانىندا قازاقستاندىق تانىمال تۇلعالار مەن بيزنەسمەندەر بار «VIP سۋتەنەردىڭ كليەنتتەرىنىڭ ءتىزىمى» مەسسەندجەرلەر مەن الەۋمەتتىك جەلىلەردە تارالىپ كەتتى.
2024 جىلدىڭ 21 مامىرىندا VIP سۋتەنەر التى جارىم جىلعا، ال ونىڭ سىبايلاسى ءۇش جىل سەگىز ايعا باس بوستاندىعىنان ايىرىلدى.
