مەكتەپ قابىرعاسىندا ءجۇرىپ، ءتۇرلى جوبالار قاتىسقان وقۋشى داۋرەن احمەتتى بەلگىلى كومپانيا جۇمىسقا شاقىرعان. ءتيىستى سالادا ءىس-تاجىريبەدەن وتكەن جاس ونەرتاپقىش ءوز جوبالارىنىڭ ەرەكششەلىكتەرىمەن ءبولىستى.
الماتىداعى №178 مامانداندىرىلعان ليتسەيدىڭ 11 سىنىپ وقۋشىسى داۋرەن احمەت - ونەرتاپقىش. عىلىمعا دەن قويعان ونەرتاپقىش قازاق تىلىندەگى كوماندامەن جۇمىس ىستەيتىن «اقىلدى ءۇي» جوباسىن ويلاپ تاپتى.
مۇمكىندىگى كوپ ءۇيدىڭ قوجاسى – قول تەلەفونى
داۋرەن احمەت بۇعان دەيىن بىرنەشە رەت رەسپۋبليكالىق عىلىمي جوبالار بايقاۋىنا قاتىسىپ، جۇلدەگەر اتانعان.
- زەرتتەۋگە دەگەن قىزىعۋشىلىعىم 7 سىنىپ وقىپ جۇرگەن كەزىمدە باستالدى. ءدال سول جىلى مەكتەبىمىزدە روبوتوتەحنيكا ۇيىرمەسى اشىلعان ەدى. 1 جىل بويى جەتەكشىم داستان راحاتوۆتىڭ كومەگىمەن بۇل سالانىڭ قىر-سىرىن زەرتتەدىم. العان ءبىلىمىمنىڭ ناتيجەسىندە اۆتوماتتاندىرىلعان قوقىس جاشىگىن جاساعان بولاتىنمىن. ول ادامداردىڭ كەلە جاتقانىن سەزىپ، قاقپاعىن بىردەن اشاتىن. سولاي-سولاي جاڭا دۇنيەلەردى قۇراستىرۋعا دەگەن ىنتام اشىلدى، - دەيدى جاس دارىن.
ۋاقىت وتە كەلە داۋرەن تەلەفون ارقىلى باسقارۋعا بولاتىن زاماناۋي ءۇيدى جاساۋدى قولعا العان. مۇمكىندىگى كوپ ۇيدە تۇرۋ ءۇشىن قولىڭىزدا تەلەفون بولسا جەتىپ جاتىر.
- 9 سىنىپ وقىپ جۇرگەن كەزىمدە سىنىپتاسىم تولەگەن دياسپەن «SMS-حابارلامالار ارقىلى زاتتاردى باسقارۋ فۋنكتسياسى بار اقىلدى مەكتەپ جوباسى» تاقىرىبىندا عىلىمي-زەرتتەۋ جۇمىسىن جازدىق. تەحنيكانىڭ دامىعان زامانىندا زاماناۋي تەحنولوگيالاردىڭ كومەگىمەن SMART SCHOOL جوباسى ارقىلى رەسپۋبليكالىق كەزەڭگە جولداما الىپ، الماتى قالاسىنىڭ اتىنان قاتىستىق، - دەيدى ول.
قاۋىپسىزدىك جۇيەسىندەگى «اقىلدى ءۇي»
داۋرەن كەيىن وسىعان ۇقساس جۇمىستاردى دامىتقىسى كەلگەنىن ايتادى.
- وسىلايشا نازارىمىز سوڭعى جىلدارى ەرەكشە تانىمالدىلىققا يە «اقىلدى ءۇي» جوباسىنا ءتۇستى. مەن دە ءدال وسىنداي ونەرتابىس جاساعىم كەلىپ، 10 سىنىپتا ءوز زەرتتەۋىمدى باستادىم. ىزدەنىس بارىسىندا «اقىلدى ۇيلەردىڭ» كوپشىلىگى ورىس نە اعىلشىن تىلىندە جۇمىس ىستەيتىنىنە كوز جەتكىزدىم. وسىلايشا ولاردى نەگە قازاقشا سويلەتپەسكە دەگەن يدەيا كەلىپ، جوبا جۇمىسىن باستاپ كەتتىم. سىنىپتاسىم رايىمبەك ميراقپاروۆپەن جاساعان ءۇي قازاق تىلىندە قاشىقتان دا باسقارىلا بەرەدى. وعان ارنايى باعدارلامالاردى ورناتتىق. جارىق ءوشىپ قالسا، ءۇي گەنەراتور ارقىلى قۋات الادى. ەگەر ءۇي يەسى شەتەلگە كەتىپ قالسا، SMS ارقىلى ۇيدەگى جاعدايدى باقىلاپ، رەتتەي الادى، - دەگەن ول جوبانى جاساۋدا باعدارلامالاردى جاساپ شىعۋ قيىن بولعانىن ايتادى.
جاس زەرتتەۋشىنىڭ ايتۋىنشا، «اقىلدى ءۇي» جوباسى قاۋىپسىزدىك جۇيەسىنە قوسىلعان.
- دالاعا شىعىپ بارا جاتقان كەزدە «لازەر» دەپ ايتۋ كەرەك. بۇل ارنايى كوماندا ارقىلى ەسىك-تەرەزەلەردە لازەر پايدا بولادى. ەگەر ۇيگە بەيتانىس ادام كەلىپ، ول لازەردى قيىپ وتسە، اۆتوماتتى تۇردە ءۇي يەسىنە قوڭىراۋ شالىنادى. وسىلايشا ءمان-جايدى قاشىقتا وتىرىپ-اق بىلۋگە بولادى. «اقىلدى ءۇي» ادامدارعا قولايلىلىق پەن جارقىن ءومىر سۇرۋگە مۇمكىندىك بەرەدى، - دەپ ءتۇسىندىردى داۋرەن احمەت.
«بىلتىر جاسىم جەتپەدى، بيىل باستايمىن»
داۋرەن احمەت بۇل جوباعا كوپتەگەن جاننىڭ قىزىعۋشىلىق تانىتقانىن اتاپ ءوتتى.
- «اقىلدى ءۇيدى» «Digital Almaty-2023» اتتى حالىقارالىق تسيفرلىق فورۋمىندا تانىستىرعان بولاتىنبىز. سول كەزدە ءبىزدى ورىس تىلىندە اقىلدى ءۇي قوسىمشاسى مەن قۇرىلعىسىن جاساپ جۇرگەن «Connect home» كومپانياسى ءىس-تاجىريبەدەن وتۋگە شاقىردى. بۇل كۇتپەگەن جاڭالىق بولدى. بىلىكتى مامانداردان كوپ دۇنيەنى ۇيرەندىك. ولار ءتىپتى رەسمي تۇردە بىرلەسىپ جۇمىس ىستەۋگە دە ۇسىنىس تاستادى. وكىنىشكە قاراي، وتكەن جىلى جاسىم جەتپەدى. بۇيىرسا، بيىل باعىمدى سىناپ، جۇمىستى باستاماقپىن،- دەدى تالانتتى وقۋشى.
داۋرەن بيىل التىن ۇيا مەكتەبىمەن قوشتاسىپ، ۇلكەن ومىرگە قادام باسپاقشى. قازىردىڭ وزىندە ونىڭ بولاشاققا ارناعان وزىندىك جوبا-جوسپارى بار.
ديانا اسان،
«ادىرنا» ۇلتتىق پورتالى
