قازاقستاننىڭ ەكس-پرەمەر-ءمينيسترى، شايبالى حوككەي فەدەراتسياسىنىڭ پرەزيدەنتى اسقار مامين اراعا 2 جىل سالىپ، اقوردادا بوي كورسەتتى، دەپ حابارلايدى «ادىرنا» ءتىلشىسى.
«قاڭتار» وقيعاسىنان كەيىن قىزمەتىنەن كەتكەن شەنەۋنىك 2 مامىردا پرەزيدەنت قاسىم-جومارت توقاەۆ پەن رەسەي حوككەي فەدەراتسياسىنىڭ پرەزيدەنتى ۆلاديسلاۆ ترەتياكتىڭ كەزدەسۋىنە قاتىستى.
ەسكە سالايىق، اسقار مامين 2019 جىلدان 2022 جىلدىڭ 5 قاڭتارىنا دەيىن پرەمەر-مينيستر قىزمەتىن اتقارعان ەدى. قاڭتارداعى وقيعالاردان كەيىن مامين باستاعان ۇكىمەت وتستاۆكاعا كەتتى. ول 2022 جىلدىڭ ناۋرىز ايىنا دەيىن پرەزيدەنت جانىنداعى رەفورمالار جونىندەگى جوعارى كەڭەستىڭ مۇشەسى بولدى. بۇعان دەيىن ەكس-پرەمەر-مينيسترگە قاتىستى قىلمىستىق ءىس قوزعالدى دەگەن قاۋەسەت تاراعان بولاتىن. الايدا سىبايلاس جەمقورلىققا قارسى ءىس-قيمىل اگەنتتىگى بۇل اقپاراتتى جوققا شىعاردى.
مامين وتستاۆكاعا كەتسە دە، «Qazaq Geography» قوعامدىق بىرلەستىگىنىڭ توراعاسى قىزمەتىن ساقتاپ قالدى. سونىمەن قاتار، ەكس-پرەمەر 2012 جىلدان بەرى قازاقستان حوككەي فەدەراتسياسىن باسقارادى.
بيىل، 26 ساۋىردە اسقار مامين ۇلتتىق وليمپيادا كوميتەتىنىڭ ۆيتسە-پرەزيدەنتى بولىپ سايلاندى.
