بۇگىن مەملەكەتتىك قىزمەت ىستەرى اگەنتتىگىنىڭ 2023 جىلدىڭ جۇمىس قورىتىندىسى بويىنشا القا وتىرىسى ءوتتى.
وعان پرەزيدەنت اكىمشىلىگىنىڭ وكىلدەرى، پرەزيدەنت جانىنداعى مەملەكەتتىك باسقارۋ اكادەمياسى، اگەنتتىك جانىنداعى قوعامدىق كەڭەس، ادەپ جونىندەگى كوميسسيا، سەرۆيستىك مەملەكەتتىك اپپاراتتى قالىپتاستىرۋ جانە ونىڭ قىزمەتىن بيۋروكراتيادان ارىلتۋ جونىندەگى كونسۋلتاتيۆتىك-ساراپتامالىق توپ مۇشەلەرى قاتىستى.
مقىا توراعاسى دارحان جازىقباي وتكەن جىلى اگەنتتىكتىڭ بارلىق باستامالارى مەملەكەت باسشىسىنىڭ مەملەكەتتىك اپپاراتتىڭ ادامعا باعدارلانعان جانە سەرۆيستىك مودەلىن قالىپتاستىرۋ بويىنشا قويعان مىندەتتەرىن جۇزەگە اسىرۋعا باعىتتالعانىن اتاپ ءوتتى.
وتكەن جىلى پرەزيدەنتتىڭ تاپسىرماسىنا سايكەس مەملەكەتتىك باسقارۋ اكادەمياسىنىڭ قۇرىلىمىندا ادامي رەسۋرستاردى باسقارۋدىڭ زاماناۋي قۇرالدارىن قولداناتىن ارنايى HR ينستيتۋتى قۇرىلدى.
دارحان جازىقباي اگەنتتىكتىڭ ەلىمىزدىڭ كادرلىق الەۋەتىن ارتتىرۋ باعىتتارىندا ىسكە اسىرىلعان پرەزيدەنتتىك جاستار كادر رەزەرۆى جوباسى تۋرالى ايتتى. ءۇشىنشى ىرىكتەۋگە قاتىسۋعا 30 مىڭنان استام ادام ءوتىنىش ءبىلدىردى، بۇل ونىڭ جاستار اراسىنداعى جوعارى تانىمالدىلىعىن كورسەتتى.
تىكەلەي تاعايىنداۋ مۇمكىندىكتەرىنە سايكەس جوعارى وقۋ ورنىن بىتىرگەن 100-دەن استام تۇلەك كونكۋرستان تىس اۋداندىق جانە اۋىلدىق دەڭگەيدەگى تومەنگى لاۋازىمدارعا تاعايىندالدى، ال 300-گە جۋىق جەكە سەكتوردىڭ تاجىريبەلى مامانى مەملەكەتتىك قىزمەتكە قابىلداندى.
اگەنتتىك توراعاسى جاس مامانداردى مەملەكەتتىك باسقارۋ جۇيەسىنە تارتۋ جۇمىستارى جالعاساتىنىن ايتتى. بيىل العاش رەت وڭىرلىك جاستار كادر رەزەرۆتەرىنە ىرىكتەۋ جۇرگىزىلەدى. ىرىكتەۋ 7 سالالىق باعىت بويىنشا وتەدى.
دارحان جازىقباي «e-Qyzmet» جۇيەسى بويىنشا التى مەملەكەتتىك ورگاندا وتكەن مەملەكەتتىك قىزمەتكە ىرىكتەۋدىڭ جاڭا پيلوتتىق جوباسىنىڭ ءساتتى جۇزەگە اسىرىلعاندىعىن ايتتى. وسىلايشا، كونكۋرستارعا قاتىسۋشىلار سانىنىڭ ارتۋىندا وڭ ديناميكا بايقالادى. جاڭا جۇيەمەن مەملەكەتتىك قىزمەتكە 650-دەن استام ادام قابىلدانسا، كونكۋرستارعا قاتىسقان ۇمىتكەرلەردىڭ سانى 5800-ءدى قۇراپ وتىر. جاڭا جوبا بويىنشا ءبىر ورىنعا قاتىسۋشىلاردىڭ ۇلەس كورسەتكىشى 4,6 ادامدى قۇراپ، قولدانىستاعى ىرىكتەۋ تارتىبىمەن سالىستىرعاندا قاتىسۋشىلاردىڭ سانى 2,7 ەسەگە ارتتى. بيىل جاڭا ىرىكتەۋ جۇيەسىن كەزەڭ-كەزەڭمەن بارلىق مەملەكەتتىك ورگاندارعا ەنگىزۋ جوسپارلانۋدا.
مەملەكەتتىك قىزمەتتە قولايلى جاعدايلار جاساۋعا باعىتتالعان بىرقاتار زاڭنامالىق باستامالار قابىلداندى. باسقا وڭىرلەرگە روتاتسيالاناتىن مەملەكەتتىك قىزمەتشىلەرگە روتاتسيالىق تولەمدەر ەنگىزىلدى. يكەمدى كەستەلەردى قولدانۋ جانە قاشىقتىقتان جۇمىس ىستەۋ ەرەجەسى بەكىتىلدى، ولاردى قولدانۋ پراكتيكاسى 72,4%-عا ءوسىپ وتىر.
سونىمەن قاتار، مەملەكەتتىك اكىمشىلىك قىزمەتشىلەردىڭ باسشى جانە اتقارۋشى قۇرامىنىڭ اراقاتىناسىن ايقىنداۋ قاعيدالارى بەكىتىلىپ، «كەلىسىمشارتتىق قىزمەتشىلەر» ينستيتۋتى ەنگىزىلدى.
القا وتىرىسىندا مەملەكەتتىك قىزمەتشىلەردىڭ قۇقىقتارىن قورعاۋ شارالارى باياندالدى. دارحان جازىقبايدىڭ ايتۋىنشا، 2023 جىلدىڭ قورىتىندىسى بويىنشا اگەنتتىكپەن 513 مەملەكەتتىك ورگاندا جۇمىس ۋاقىتىنىڭ ساقتالۋىنا مونيتورينگ جۇرگىزگىلدى، ونىڭ ناتيجەسىمەن 234 مەملەكەتتىك قىزمەتشىگە قوسىمشا دەمالىس ۋاقىتى بەرىلگەن.
سونداي-اق 2023 جىلى ادەپ جونىندەگى كەڭەستەردىڭ 195 وتىرىسى ءوتىپ، وندا 1300-دەن استام ماسەلە قارالعانى ايتىلدى. ولاردىڭ 62% پروفيلاكتيكالىق سيپاتتا جانە ادەپ بۇزۋشىلىقتاردىڭ الدىن الۋعا باعىتتالدى.
مەملەكەتتىك قىزمەتشىلەردىڭ كاسىبي جانە تۇلعالىق دامۋىنا ەرەكشە كوڭىل بولىنەدى. «ادال ازامات» ۇستانىمدارى مەن يدەالدارىن ىلگەرىلەتۋ، جاڭا باسقارۋ مادەنيەتىن قالىپتاستىرۋ جۇمىستارى باستالدى.
اگەنتتىك قىزمەتىندەگى ماڭىزدى باعىت – مەملەكەتتىك قىزمەت كورسەتۋ ساپاسىنا باقىلاۋ جۇرگىزۋ. 2023 جىلى 498 تەكسەرۋ جۇرگىزىلدى، پرواكتيۆتى مونيتورينگ تاجىريبەسىنىڭ ارقاسىندا 11 مىڭنان استام قۇقىق بۇزۋشىلىق انىقتالدى. وسىنداي شارالاردىڭ ناتيجەسىندە 360 ازاماتتىڭ قۇقىقتارى قالپىنا كەلتىرىلدى.
القا وتىرىسىندا مەملەكەتتىك اپپاراتتى بيۋروكراتيادان ارىلتۋ بويىنشا جۇمىستىڭ الدىن الا قورىتىندىلارى ايتىلدى. مەملەكەتتىك ورگاندارمەن بىرلەسكەن جۇمىس ناتيجەسىندە 550-دەن استام بيۋروكراتيالىق كەيستەر ازىرلەندى. ۇسىنىستاردىڭ 152-ءسىن ىسكە اسىرۋ ءۇشىن زاڭنامالىق دەڭگەيدە شەشىمدەر قابىلداۋدى قاجەت ەتەدى.
مقىا جانىنداعى قوعامدىق كەڭەسىنىڭ ءتورايىمى بيبىگۇل اعىباەۆا وتكەن جىلى قوعامدىق كەڭەستىڭ 5 وتىرىسى ءوتىپ، 31 نورماتيۆتىك قۇقىقتىق اكتىلەر قارالعانىن ايتتى. ءوز كەزەگىندە دارحان جازىقباي قوعامدىق كەڭەس مۇشەلەرىنە اگەنتتىكتىڭ ءىس-شارالارىنا بەلسەندى قاتىسقاندارى ءۇشىن العىسىن ءبىلدىرىپ، ودان ءارى تىعىز ىنتىماقتاستىقتا جۇمىس جاساۋعا شاقىردى.
سونىمەن قاتار، القا وتىرىسىندا اگەنتتىكتىڭ الداعى جىلعا ارنالعان جۇمىس جوسپارلارى تالقىلاندى. ولاردىڭ قاتارىندا – مەملەكەتتىك قىزمەتتى كاسىبيلەندىرۋ بويىنشا جۇمىستى جالعاستىرۋ، مەملەكەتتىك اپپاراتتى بيۋروكراتيادان ارىلتۋ بويىنشا زاڭ شىعارۋشىلىق قىزمەتتى كۇشەيتۋ، جاستاردى مەملەكەتتىك قىزمەتكە تارتۋ جانە ودان ءارى تسيفرلاندىرۋ پروتسەستەرىن جەتىلدىرۋ بار.
قر مقىا ءباسپاسوز قىزمەتى
