قىزىلجارداعى "حالىق كەڭەسى" اتتى ۇيىمنىڭ ارەكەتىنە ساراپتاما-تالداما جۇرگىزگەن ساياساتتانۋشىلار "سەپاراتيزم بەلگىلەرىن" انىقتادى. ناقتىراق ايتقاندا، سەپاراتيزمدى ناسيحاتتادى دەگەن كۇدىككە ىلىنگەن ۇيىمعا قاتىستى ساراپتاما ناتيجەسى شىقتى. توپتىڭ ءۇش بەلسەندىسى ۋاقىتشا ۇستاۋ يزولياتورىنا قاماۋعا الىندى. تەرگەۋ ءالى جالعاسىپ جاتىر، دەپ حابارلايدى "ادىرنا" ۇلتتىق پورتالى.
بۇگىن سولتۇستىك قازاقستان وبلىستىق پروكۋراتۋراسى بريفينگ وتكىزىپ، وزدەرىن «حالىق كەڭەسى» دەپ اتاعان توپتىڭ ءۇش بەلسەندىسىنىڭ قاماۋعا الىنعانىن جاريالادى.
«سەپاراتيزمدى ناسيحاتتادى دەگەن كۇدىككە ىلىنگەن توپقا قاتىستى ەكى قىلمىستىق ءىس قوزعالدى. ولاردىڭ ارەكەتى قر قىلمىستىق كودەكستىڭ 180-بابى، 2-بولىگى بويىنشا قازاقستان رەسپۋبليكاسىنىڭ بىرتۇتاستىعى مەن تۇتاستىعىن ىدىراتۋدى ناسيحاتتاۋ نەمەسە وعان جاريا تۇردە بۇقارالىق اقپارات قۇرالدارىن جانە تەلەبايلانىس جەلىلەرىن شاقىرۋمەن ماتەريالداردى تاراتۋ جانە قىلمىستىق كودەكستىڭ 179-بابى بويىنشا مەملەكەتتىڭ قاۋىپسىزدىگىن ىدىراتۋدى ۇگىتتەۋ بويىنشا ساراپتالعان.
مۇنداي ارەكەتتەر قر زاڭناماسى بويىنشا اۋىر قىلمىستار ساناتىنا كىرەدى. ول ءۇشىن سانكتسياسىمەن، قاتاڭ تۇردە 10 جىلعا دەيىنگى مەرزىمگە باس بوستاندىعىنان ايىرۋ تۇرىندەگى بالاماسىز جازالاۋ قولدانىلادى.
توپتىڭ نەگىزگى ءۇش فيگۋرانتى بۇگىن ءبىر ساعات بۇرىن ۋاقىتشا ۇستاۋ يزولياتورىنا قاماۋعا الىندى»، - دەدى سقو پروكۋراتۋراسى باسقارماسىنىڭ باستىعى عاني جالبي.
ساياساتتانۋشى جانە وزگە دە مامانداردىڭ قاتىسۋىمەن بولعان كوميسسيالىق پسيحولوگيالىق-فيلولوگيالىق سوت ساراپتاماسىنىڭ قورىتىندىلارىنا سايكەس سەپاراتيزم بەلگىلەرى انىقتالعان.
«تەرگەۋ بارىسىندا پەتروپاۆل قالاسىندا 2023 جىلعى 19 ناۋرىزدا سولتۇستىك قازاقستان ۋنيۆەرسيتەتىنىڭ كوللەدج عيماراتىندا «حالىق كەڭەسى» توبىنا قاتىسۋشىلار وبلىس ورتالىعىنىڭ 20 ازاماتىنان تۇراتىن توپتىڭ جينالىسى وتكەندىگى، ولار وزدەرىن كەڭەس سوتسياليستىك رەسپۋبليكالار وداعىنىڭ ءىزباسارلارى دەپ كوزقاراستارىن بىلدىرگەندىكتەرى بەلگىلى بولدى. بىرەۋى كامەلەت جاسىنا تولماعان بالاسىمەن كەلگەن.
قالعان 16 ادام جۇمىستارىنان شەتتەتىلگەن جوق، قىزمەتتەرىن جالعاستىرىپ جاتىر. ولار بويىنشا شەشىم قابىلدانعان جوق.
كىناسى دالەلدەنگەن جاعدايدا جازاعا تارتىلادى. تەرگەۋ بارىسى قاتاڭ باقىلاۋدا. كىمنىڭ قايدا جۇمىس ىستەيتىندىگى تۋرالى، قالاي بۇل توپقا قوسىلعاندىعى تۋرالى ازىرگە قر قىلمىستىق-پروتسەستىك كودەكسىنىڭ 201-بابىنا سايكەس جاريالاۋعا جاتپايدى.
قازىرگى ۋاقىتتا تەرگەۋ ارەكەتتەرى جالعاسۋدا جانە جينالىسقا قاتىسقان باسقا تۇلعالارعا قاتىستى وبەكتيۆتى جانە جان-جاقتى قۇقىقتىق باعا بەرىلەتىن بولادى»، - دەدى عاني جالبي.
ەستەرىڭىزگە سالايىق، 30 ناۋرىزدا «حالىق كەڭەسى» توبىنا قاتىسۋشىلاردىڭ جينالىسى تۋرالى ينتەرنەت جەلىلەردەگى بەينەروليك بويىنشا ۇلتتىق قاۋىپسىزدىك كوميتەتىنىڭ سقو بويىنشا دەپارتامەنتىمەن سەپاراتيزم فاكتىسى بويىنشا سوتقا دەيىنگى تەرگەۋدى باستاعان ەدى. سول كۇنى وبلىس پروكۋراتۋراسىنىڭ نۇسقاۋى بويىنشا ۇلتىق قاۋىپسىزدىك كوميتەتى دەپارتامەنتىنىڭ، پوليتسيا دەپارتامەنتىنىڭ، ەكونوميكالىق تەرگەۋ دەپارتامەنتىنىڭ، وبلىستىڭ سىبايلاس جەمقورلىققا قارسى قىزمەتى قىزمەتكەرلەرىنەن ۆەدومستۆوارالىق جەدەل-تەرگەۋ توبى قۇرىلدى، پروتسەستىك پروكۋرورلار تاعايىندالدى.
"ادىرنا" ۇلتتىق پورتالى
