الەۋمەتتىك جەلىدە شىعىس قازاقستان وبلىسى ۇلان اۋدانى قاسىم قايسەنوۆ اۋىلىندا ورناتىلعان شىرشانىڭ سۋرەتى قىزۋ تالقىلانۋدا، دەپ حابارلايدى “ادىرنا” ۇلتتىق پورتالى
قۇلاعان بۇتاقتارى بار شىرشا كوپشىلىك سىنىنا قالدى. پىكىر بىلدىرۋشىلەر بۇعان قانشا اقشا جۇمسالعانىنا جاۋاپ بەرۋدى تالاپ ەتتى.
"شىرشا بيۋدجەت ەسەبىنەن ەمەس، تەگىن ورناتىلدى. ەندى ونىڭ ورنىنا جاڭا، جاساندى شىرشا اكەلەمىز. بىردەن ايتا كەتۋ كەرەك، بۇعان بيۋدجەتتەن اقشا قاراستىرىلماعان. ۇلان قورى بار. ءبىز سول قوردىڭ قاراجاتىنا جاساندىسىن ورناتۋىمىز مۇمكىن. بىراق ازىرگە بەلگىسىز. بۇگىن ەسكى شىرشانى الىپ تاستادىق، ەرتەڭ جاڭاسىن قويامىز", - دەپ جاۋاپ بەردى ۇلان اۋدانى اكىمدىگىنىڭ ءباسپاسوز قىزمەتى.
بەلگىلى بولعانداي، شىرشانىڭ جەرگىلىكتى تۇرعىننىڭ ءوتىنىشى بويىنشا قازىپ الىنعانىنا كوپ بولماعان. اۋىل تۇرعىنى اۋلاسىندا وسكەن شىرشا كۇن ساۋلەسىن جاۋىپ تۇرعاندىقتان الىپ تاستاۋدى وتىنگەن. ال اكىمدىك شىرشانى قوقىسقا تاستاماي، قايتا وتىرعىزىپ، جاڭا جىلعا ساندەۋدى ءجون كورگەن.
"بۇل شىرشانى دا تاستامايمىز. الى دە وڭدەپ، كوشىرىپ، سوڭىنا دەيىن بەزەندىرەمىز", - دەپ قوستى ۇلان اۋدانى اكىمدىگىنىڭ ءباسپاسوز قىزمەتى.
