يران يسلام رەسپۋبليكاسىنىڭ پرەزيدەنتى ورازا ايت پەن ناۋرىز مەيرامدارىنا وراي قازاقستان پرەزيدەنتىنىڭ اتىنا قۇتتىقتاۋ جەدەلحاتتارىن جولدادى، دەپ حابارلايدى “ادىرنا”.
اقوردا مالىمەتىنە سۇيەنسەك، ماسۋد پەزەشكيان قۇتتىقتاۋىندا مەيىرىم مەن بەرەكەگە تولى وسى قاستەرلى كۇندەرى مۇسىلمان ەلدەرى اراسىنداعى تاتۋلىق نىعايىپ، ءوزارا ىقپالداستىقتىڭ تەرەڭدەۋىنە سەپتىگىن تيگىزەتىنىنە سەنىم ءبىلدىردى.
ء"وز كەزەگىندە مەملەكەت باسشىسى قاسىم-جومارت توقاەۆ تاياۋ شىعىستا تۇراقتىلىق ورناۋىنا جانە باۋىرلاس حالىقتاردىڭ ىنتىماعى بەكي تۇسۋىنە تىلەكتەس ەكەنىن ايتتى. پرەزيدەنت قاسيەتتى ورازا ايت پەن ءاز-ناۋرىزدىڭ جاڭارۋ رۋحى يران حالقىنا بەيبىتشىلىك جانە باق-بەرەكە اكەلسىن دەگەن تىلەگىن جەتكىزدى", دەلىنگەن اقوردا حابارلاماسىندا.
ايتا كەتەيىك، 28 اقپاندا اقش پەن يزرايل يرانعا شابۋىلداعان. Cودان بەرى قاقتىعىس ءالى توقتامادى. يران وعان جاۋاپ رەتىندە اقش-تىڭ پارسى شىعاناعى ەلدەرىندە ورنالاسقان اسكەري بازالارىن اتقىلاعان. قازاقستان يراننىڭ بۇل ارەكەتىن ايىپتاعان. 15 ناۋرىزدا قازاقستان باسشىسى قاسىم-جومارت توقاەۆ جاڭا كونستيتۋتسيا رەفەرەندۋمىنا داۋىس بەرە كەلىپ، يراندى ايتىپ، ەلدە قوس بيلىكتىڭ بولماۋى كەرەگىن جانە قازاقستان ونى وتكەرگەنىن ەسكە سالعان بولاتىن.
“يراندا ءدىني بيلىك نەگىزگى باعىت-باعداردى ايقىنداپ، شەشىم قابىلدايدى. پرەزيدەنت تە بار، بىراق ول — فورمالدى مەملەكەت باسشىسى، ءىس جۇزىندە ىقپالدى تۇلعا سانالمايدى. جالپى، كەز كەلگەن ەلدە، سونىڭ ىشىندە قازاقستاندا قوس بيلىك بولماۋعا ءتيىس. كەزىندە مۇنداي جۇيەنى ءبىز دە باستان وتكەردىك، بىراق بايانسىز بولدى. ءتورت جىل بۇرىن ەلىمىزدىڭ ىشكى تۇراقتىلىعىنا قاۋىپ ءتوندى. بۇل قازاقستانعا دا، باسقا مەملەكەتتەرگە دە ۇلكەن ساباق بولدى دەپ ويلايمىن. ءبىز يران حالقىنا، ونىڭ مادەنيەتى مەن تاريحىنا قۇرمەتپەن قارايمىز. سوندىقتان ءوز ۇستانىمىمىزدان اينىعان جوقپىز، ءاردايىم بەيبىتسۇيگىش ەل بولىپ قالا بەرەمىز”، - دەگەن ەدى پرەزيدەنت توقاەۆ.
