قىتايدىڭ شىعىسىنداعى فۋتسزيان پروۆينتسياسىنىڭ جاعالاۋ سۋلارىنا الەمدەگى العاشقى 20 مۆت تەڭىز جەل تۋربيناسى ورناتىلدى. ورناتۋ ورنى جاعالاۋدان 30 كم-دەن استام قاشىقتىقتا، تەرەڭدىگى 40 مەتردەن اسا جەردە ورنالاسقان، دەپ حابارلايدى «ادىرنا» ءتىلشىسى.
تۋربينادا 300 مەتر ديامەترلى روتور جانە ۇزىندىعى 147 مەتر بولاتىن ءۇش قانات بار، ال جىلدىق قۋاتى شامامەن 80 ملن كۆت·ساعاتتى قۇرايدى. جوبا قىتايدىڭ جاڭارتىلاتىن ەنەرگەتيكا سالاسى ءۇشىن ماڭىزدى كەزەڭ بولىپ سانالادى، سونداي-اق تەرەڭ سۋ ايماقتارىن جانە جاعالاۋدان الىستاعى جەرلەردى يگەرۋدە قۋاتى جوعارى تۋربينالاردى قولدانۋعا ءوتۋدى راستادى.
قىتايدىڭ ورتالىق تەلەارناسىنىڭ مالىمەتىنشە، بۇل الەمدەگى العاشقى 20 مۆت كلاسستى تەڭىز تۋربيناسى، تولىعىمەن قىتايدا جوبالانعان جانە وندىرىلگەن. ورناتىلعان تۋربينا ۇلتتىق زەرتتەۋ جانە تاجىريبەلىك-كونسترۋكتورلىق باعدارلامانىڭ ءبىر بولىگى بولادى.
ورناتۋ ءۇشىن 2000 توننا كوتەرگىشتىگى بار ءتورتىنشى بۋىنداعى مونتاجدىق كەمە قولدانىلعان. ۇزىندىعى 147 مەتر بولاتىن ءۇش قانات 174 مەتر بيىكتىككە كوتەرىلىپ، روتورعا بەكىتىلگەن. ناتيجەسىندە 300 مەتر ديامەترلى روتور جينالىپ، ونىڭ اينالاتىن اۋماعى ون فۋتبول الاڭىنا جۋىق.
تۋربينا جەڭىلدەتىلگەن كونسترۋكتسياعا يە. ورناتۋ سالماعى مەگاۆاتتقا شاققاندا سالاداعى ورتاشا كورسەتكىشتەن 20%-دان استام ازايتىلعان، بۇل مونتاجدى جەڭىلدەتىپ، قۇرىلىس شىعىندارىن قىسقارتۋعا مۇمكىندىك بەرگەن. ەنەرگوجۇيەگە قوسىلعاننان كەيىن ءبىر تۋربينا جىلىنا 80 ملن كۆت·ساعات ەلەكتر ەنەرگياسىن وندىرە الادى، بۇل 44 مىڭ ءۇيدى قامتاماسىز ەتۋگە جەتكىلىكتى.
ساراپشىلاردىڭ ەسەپتەۋىنشە، بۇل جىلىنا شامامەن 24 مىڭ توننا ستاندارتتى كومىردى ۇنەمدەۋگە جانە كومىرقىشقىل گازىن 64 مىڭ تونناعا قىسقارتۋعا مۇمكىندىك بەرەدى.
تەڭىز جەل ەنەرگەتيكاسىن دامىتۋ قىتايدىڭ تومەن كومىرتەكتى دامۋ ستراتەگياسىنا سايكەس كەلەدى. ۇلتتىق ەنەرگەتيكا باسقارماسىنىڭ مالىمەتى بويىنشا، ەلدەگى ورناتىلعان جەل ەنەرگەتيكاسىنىڭ قۋاتى 600 ملن كۆت-تان اسقان.
