2025 جىلى ەلىمىزدە زاڭسىز ۇتىس ويىندارىن ۇيىمداستىرعان 121 ادام اكىمشىلىك جاۋاپقا تارتىلىپ، ايىپپۇل ارقالادى. ءوز پاراقشالارىندا لوتەرەيا ويناتقانداردىڭ اراسىندا تانىمال بلوگەرلەر دە بار، دەپ حابارلايدى "ادىرنا".
تۋريزم جانە سپورت مينيسترلىگىنىڭ ويىن بيزنەسىن جانە لوتەرەيانى رەتتەۋ كوميتەتى الەۋمەتتىك جەلىلەر مەن ونلاين-پلاتفورمالارعا تۇراقتى مونيتورينگ جۇرگىزىپ كەلەدى.
«مونيتورينگ ناتيجەسىندە جانە جەكە تۇلعالاردان كوميتەتكە كەلىپ تۇسكەن وتىنىشتەر نەگىزىندە 2025 جىلى 121 ادام اكىمشىلىك قۇقىقبۇزۋشىلىق تۋرالى كودەكسىنىڭ 445-1-بابى 6-بولىگى بويىنشا اكىمشىلىك جاۋاپكەرشىلىككە تارتىلدى»، - دەلىنگەن حابارلامادا.
الەۋمەتتىك جەلىدە ۇتىس ويىندارىن وتكىزگەن اككاۋنتتاردىڭ ءتىزىمى مينيسترلىكتىڭ رەسمي سايتىندا جاريالانعان. ولاردىڭ اراسىندا «سۋپەرماماسيتا» لاقاپ اتىمەن تانىمال ءاليا بايتۋعاەۆا، بلوگەر مەرەكە قالباەۆا، تۇرسىنبەك قاباتوۆتىڭ بۇرىنعى ايەلى ءمولدىر مۇقانوۆا، Justking31 لاقاپ اتىمەن تانىلعان نۇربەك نۇرتازا جانە ونىڭ ايەلى، بلوگەر دارحان جولشىبەكوۆ جانە تاعى باسقالارى بار.
ەستەرىڭىزگە سالايىق، اقبتك 445-1-بابى 6 جانە 7-بولىكتەرىنە سايكەس، لوتەرەيا وپەراتورى ەمەس تۇلعا لوتەرەيا وتكىزەتىن بولسا، جەكە تۇلعالارعا 100 اەك، ال شاعىن كاسىپكەرلىك سۋبەكتىلەرىنە (جەكە كاسىپكەرلەرگە) 300 اەك ايىپپۇل قاراستىرىلعان. ءبىر جىل ىشىندە وسىنداي قۇقىقبۇزۋشىلىق قايتالانسا، جەكە تۇلعالار – 200 اەك، شاعىن كاسىپكەرلىك سۋبەكتىلەرى – 750 اەك ايىپپۇل تولەيدى. سونداي-اق لوتەرەيادان تۇسكەن تابىسى تاركىلەنەدى.
