قارجى مينيسترلىگىنىڭ مەملەكەتتىك كىرىستەر كوميتەتى 2026 جىلعى 1 قاڭتاردان باستاپ جاڭا سالىق كودەكسىمەن كۇشىنە ەنگەن كولىك سالىعىنا قاتىستى وزگەرىستەردى ءتۇسىندىردى، دەپ حابارلايدى “ادىرنا”.
اتاپ ايتقاندا، پايدالانۋ مەرزىمى 10 جىلدان 20 جىلعا دەيىنگى جەڭىل اۆتوكولىكتەر ءۇشىن كولىك سالىعىن ەسەپتەۋ كەزىندە 0,7 تۇزەتۋ كوەففيتسيەنتى قولدانىلادى، ال 20 جىلدان اسقان اۆتوكولىكتەرگە – 0,5 كوەففيتسيەنتى بەلگىلەنگەن. سالىق جىل قورىتىندىسى بويىنشا تولەنەتىنىن ەسكەرسەك، تومەندەتۋشى كوەففيتسيەنتتەردى ەسەپكە العانداعى سالىق سوماسى 2026 جىل ءۇشىن 2027 جىلى ەسەپتەلىپ، تولەنەدى.
قوزعالتقىش كولەمى 3 ليتردەن اساتىن، 2013 جىلعى 31 جەلتوقساننان كەيىن قازاقستان رەسپۋبليكاسىندا وندىرىلگەن (جاسالعان نەمەسە قۇراستىرىلعان) نەمەسە 2013 جىلعى 31 جەلتوقساننان كەيىن قازاقستان رەسپۋبليكاسىنىڭ اۋماعىنا اكەلىنگەن جەڭىل اۆتوكولىكتەرگە ارنالعان سالىق مولشەرلەمەلەرى الىپ تاستالدى.
شارۋا نەمەسە فەرمەر قوجالىقتارى وزگە دە جەڭىلدىكتەرگە قوسا، ءبىر شارۋاشىلىققا ءبىر عانا جۇك پلاتفورماسى بار جانە جۇرگىزۋشى كابيناسى جۇك بولىگىنەن قاتتى ستاتسيونارلىق قالقامەن بولىنگەن جەڭىل موتورلى كولىك قۇرالىنان (پيكاپ اۆتوكولىكتەر) كولىك سالىعىن تولەۋدەن بوساتىلادى.
سونداي-اق كولىك قۇرالدارىنىڭ ساناتتارىن كولىك تۇرىنە (پيكاپتار، دجيپتەر، ليمۋزيندەر، فۋرگوندار) قاراي بولۋگە قاتىستى نورما الىنىپ تاستالدى. ەندى كولىك قۇرالىنىڭ ساناتى كولىك قۇرالىن تىركەۋ تۋرالى كۋالىكتە كورسەتىلگەن باسقارۋ قۇقىعى ساناتىنا (A, B, C, D) سايكەس ايقىندالادى.
سالىقتىق ەسەپتىلىك نىساندارىن قىسقارتۋ ماقساتىندا كولىك سالىعى بويىنشا اعىمداعى تولەمدەردى ەسەپتەۋ تۋرالى ەسەپتى (سالىقتىق ەسەپتىلىك) تاپسىرۋ مىندەتى جويىلدى. 2026 جىلدان باستاپ سالىق تولەۋشى تەك جىلدىق دەكلاراتسيا تاپسىرىپ، سالىقتى جىل قورىتىندىسى بويىنشا ءبىر رەت تولەيتىن بولادى.
