اۋعانستاندا تۇراتىن قازاق دياسپوراسى بىرىككەن ۇلتتار ۇيىمىنىڭ ميگراتسيا بويىنشا جاھاندىق ەلشىسى، بەلگىلى ونەر يەسى ديماش قۇدايبەرگەنگە رەسمي ۇندەۋ جولدادى، دەپ حابارلايدى “ادىرنا”.
ۇندەۋدە ديماش قۇدايبەرگەننىڭ بىرىككەن ۇلتتار ۇيىمى اياسىندا ميگراتسيا بويىنشا جاھاندىق ەلشى بولۋى دياسپورا ءۇشىن ۇلكەن ءۇمىت ەكەنى اتاپ وتىلەدى. وسىعان بايلانىستى اۋعانستان قازاقتارى ەكى نەگىزگى ماسەلە بويىنشا كومەك سۇرايدى.
«قۇرمەتتى ديماش قاناتۇلى!
بۇگىندە اۋعانستاننىڭ ءار ايماعىندا 5 مىڭعا جۋىق قازاق ءومىر سۇرۋدە.
ءبىز – حح عاسىردا قازاقتىڭ باسىنان وتكەن اۋىر كەزەڭدە اۋعانستانعا وتكەن ۇرپاقپىز. بۇل ەلدەگى اۋىر جاعدايعا قاراماستان، قازاق بولىپ قالۋعا تىرىسىپ كەلەمىز. بىراق ءحالىمىز اۋىر.
ءبىزدىڭ باستى ارمانىمىز – تاريحي وتانعا ورالۋ. ۇرپاعىمىزدى امان-ەسەن قازاق ورتاسىنا جەتكىزۋ”، دەلىنگەن ۇندەۋدە.
اۋعانستان قازاق مادەني ورتالىعىنىڭ توراعاسى اسادوللا ويماۋىتتىڭ مالىمدەۋىنشە، قازىرگى ۋاقىتتا 5 مىڭعا جۋىق ادامنىڭ دەرەكتەرى، تىزىمدەرى مەن قاجەتتى قۇجاتتارى تولىق دايىن.
“قازاقستان تاراپىنا جاساعان كوپتەگەن وتىنىشكە قاراماستان، بۇل ماسەلە ءالى شەشىمىن تاپپادى. كوش-قون شەكتەۋلەرى بىزگە اتامەكەنگە ورالۋعا مۇمكىندىك بەرمەي وتىر.
ءسىزدىڭ بىرىككەن ۇلتتار ۇيىمىندا ميگراتسيا بويىنشا ىزگىلىك ەلشىسى بولعانىڭىز، بىزگە ۇلكەن ءۇمىت سىيلايدى.
سوندىقتان سىزدەن مىنانى سۇرايمىز:
• ءبىزدى رەپاترياتسيالىق باعدارلاماعا قوسۋعا جاردەم;
• مادەني-گۋمانيتارلىق قولداۋ.
بىزدە قازىر 5000 ادامنىڭ اقپاراتى مەن تىزىمدەرى جانە قۇجاتتارى دايىن”، – دەدى اۋعانستان قازاق مادەني ورتالىعىنىڭ توراعاسى.
اتالعان ۇندەۋ 2025 جىلدىڭ 25 جەلتوقسانىندا جولدانعان. دياسپورا وكىلدەرى حالىقارالىق ۇيىمدار مەن جاۋاپتى تاراپتار بۇل ماسەلەگە نازار اۋدارادى دەگەن ۇمىتتە.
