يتاليانىڭ سولتۇستىگىندەگى ۇلتتىق ساياباقتان مىڭداعان دينوزاۆر ءىزى تابىلدى. كەيبىر ىزدەردىڭ ديامەترى 40 سانتيمەترگە دەيىن جەتەدى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
عالىمداردىڭ ايتۋىنشا، بۇل ولجاعا شامامەن 210 ميلليون جىل بولعان. ىزدەر ءبىر-بىرىنە پاراللەل ورنالاسقان، ولاردىڭ كوبىندە ساۋساقتار مەن تىرناقتاردىڭ تاڭبالارى انىق كورىنەدى.
زەرتتەۋشىلەردىڭ بولجامىنشا، ىزدەردى پروزاۋروپودتار قالدىرعان. بۇل – مويىنى ۇزىن، باسى كىشكەنتاي، وتكىر تىرناقتارى بار شوپقورەكتى دينوزاۆرلار.
«مەن ءوزىم تۇراتىن وڭىردە وسىنداي اسەرلى جاڭالىققا تاپ بولامىن دەپ ەشقاشان ويلاماپپىن»، — دەدى ميلاندىق پالەونتولوگ كريستيانو دال ساسسو.
وتكەن جىلدىڭ قىركۇيەك ايىندا اۋەسقوي فوتوگراف ەليو دەللا فەررەرا ميلان قالاسىنان سولتۇستىك-شىعىسقا قاراي ورنالاسقان ستەلۆيو ۇلتتىق ساياباعىنان تىك جارتاستى تاۋ بەتكەيى بويىمەن جۇزدەگەن مەترگە سوزىلعان ەرەكشە ىزدەردى بايقاعان.
ترياس كەزەڭىندە (شامامەن 250–201 ميلليون جىل بۇرىن) بۇل جارتاستىڭ ورنىندا كەيىننەن ءالپى تاۋلارىنىڭ ءبىر بولىگىنە اينالعان جازىق جەر بولعان.
«بۇل اۋماق دينوزاۆرلارعا تولى بولعان. بۇل — عىلىم ءۇشىن اسا قۇندى، وراسان زور قازىنا»، — دەيدى دال ساسسو.
يتاليانىڭ مادەنيەت مينيسترلىگى ىزدەر جاتقان اۋدانعا جەتۋ قيىن جانە جاياۋ بارۋ مۇمكىن ەمەس ەكەنىن مالىمدەدى. ايتۋلارىنشا، ول جاققا قاراي جول جوق. سوندىقتان ونى زەرتتەۋ ءۇشىن دروندار مەن قاشىقتان زوندتاۋ تەحنولوگيالارى قولدانىلماق.
ستەلۆيو ۇلتتىق ساياباعى يتاليا مەن شۆەيتساريا شەكاراسىنداعى فراەلە اڭعارىنداورنالاسقان. ول كەلەسى جىلى وتەتىن قىسقى وليمپيادا ويىندارىنىڭ وتكىزۋ ورىندارىنا جاقىن ماڭدا جاتىر.
«تاريحتىڭ ءوزى تابيعات پەن سپورت اراسىنداعى سيمۆولدىق ەستافەتانى جالعاپ، وتكەن مەن بۇگىندى توعىستىرا وتىرىپ، الەمدىك دەڭگەيدەگى ەڭ ءىرى سپورتتىق وقيعاعا تاعزىم جاساعانداي اسەر قالدىرادى»، — دەپ جازدى ەلدىڭ مادەنيەت مينيسترلىگى.
