الماتىدا Qazaq Expert Club العاشقى لەگىنىڭ قورىتىندى networking ءىس-شاراسى ءوتتى.
جوبا — ساراپشىلاردى كاسىبي كوممۋنيكاتسياعا، مەديامەن جۇمىس ىستەۋگە جانە قوعامدىق الاڭدا ساپالى پىكىر قالىپتاستىرۋعا ۇيرەتۋگە باعىتتالعان ءبىلىم بەرۋ باستاماسى. شارا بەيرەسمي ءارى جىلى اتموسفەرادا ءوتىپ، قاتىسۋشىلار، مەنتورلار جانە مەديانارىق وكىلدەرى بەس اپتالىق ينتەنسيۆ ناتيجەلەرىن تالقىلاپ، جاڭا ساراپشىلار قاۋىمداستىعىنىڭ قالىپتاسقانىن اتاپ ءوتتى.
Qazaq Expert Club ءتۇرلى سالا ماماندارىن بىرىكتىرىپ، ولاردى اقپاراتتىق كەڭىستىكتە سەنىمدى ارەكەت ەتۋگە، كاسىبي پىكىر بەرۋگە جانە قوعامدىق تالقىلاۋلاردا ساپالى ديسكۋرس ورناتۋعا باعىتتالعان الاڭ رەتىندە قۇرىلدى. جوبا ىسكە قوسىلعان ساتتەن-اق مەديانارىقتىڭ نازارىن اۋداردى: تىڭداۋشىلار وقۋ بارىسىندا-اق جاڭالىقتاردا كورىنە باستادى، ال باعدارلاما اياقتالعانعا دەيىن ولاردىڭ قاتىسۋىمەن 30-دان استام ماتەريال جارىق كوردى.
باعدارلاماعا قاتىسۋ ءۇشىن 98 ءوتىنىم ءتۇسىپ، ناتيجەسىندە الماتى، استانا، شىمكەنت، پەتروپاۆل جانە تالدىقورعاننان 40 ساراپشى ىرىكتەلدى. لەك قۇرامىنا ەكونوميكا، قارجى، حالىقارالىق قاتىناستار، الەۋمەتتىك ساياسات، ۋربانيستيكا، مەديتسينا، ەنەرگەتيكا، ءبىلىم بەرۋ، تسيفرلاندىرۋ، ەكولوگيا، سپورت، لوگيستيكا جانە كرەاتيۆ يندۋستريا سياقتى كوپتەگەن باعىتتىڭ وكىلدەرى ەندى. قازاق، ورىس جانە اعىلشىن تىلدەرىن مەڭگەرگەن كوپسالالى مامانداردىڭ قالىپتاسۋى ولاردىڭ مەدياكەڭىستىكتەگى ىقپالىن ارتتىرا تۇسەتىنى اتاپ ءوتىلدى.
ينتەنسيۆ بەس اپتاعا سوزىلىپ، بەس نەگىزگى مودۋلدەن تۇردى: ساراپشى ءرولى جانە نارىقپەن جۇمىس، رەتتەۋ نەگىزدەرى جانە ىسكەرلىك پروتسەستەر، مەديامەن جۇمىس جانە كوپشىلىك الدىندا سويلەۋ، PR مەن digital داعدىلار، سونداي-اق جۇيەلى جوبالاردى دامىتۋ جانە ساراپشىلىق پوزيتسيا قالىپتاستىرۋ. ساباقتار تاجىريبەگە باعىتتالدى — قاتىسۋشىلار ناقتى كەيستەر شەشىپ، سۇحبات مودەلدەپ، ديسكۋسسيالاردى تالداپ، جەكە ساراپشىلىق ماتەريالدار دايىندادى. جيىرمادان استام پراكتيك مامان ءدارىس وقىدى: جۋرناليستەر، رەداكتورلار، مەديا-مەنەدجەرلەر، زاڭگەرلەر، مەملەكەتتىك ورگاندار وكىلدەرى مەن سالالىق ساراپشىلار.
قورىتىندى شارادا جوباعا قاتىسقان ماماندار باعدارلامانىڭ نارىق ءۇشىن ماڭىزىن اتاپ ءوتتى. Halyk Bank PR باسقارماسىنىڭ باسشىسى ميرا حالينا مەديادا ەكونوميكالىق جانە قارجىلىق پروتسەستەردى كاسىبي تۇسىندىرە الاتىن ساراپشىلاردىڭ از ەكەنىن ايتىپ، Qazaq Expert Club بۇل ولقىلىقتىڭ ورنىن تولتىرۋعا ىقپال ەتكەنىن جەتكىزدى. سجرا توراعاسىنىڭ ورىنباسارى ولجاس تولەۋوۆ جوبانىڭ ماماندار الەۋەتىن اشۋعا مۇمكىندىك بەرگەنىن اتاپ ءوتتى. ال ازىق-تۇلىك قاۋىپسىزدىگى جونىندەگى ساراپشى، فيناليست لاۋرا اۋتەلەەۆا جوبا اتموسفەراسىنىڭ ەرەكشە ەكەنىن جانە ەلىمىزدەگى جەتەكشى ساراپشىلارمەن تانىسىپ، تاجىريبە ءبولىسۋ مۇمكىندىگى ۇلكەن قۇندىلىق بولعانىن ايتتى.
باعدارلاما كەزەڭىندە جانە ول اياقتالعاننان كەيىن جوبا ساراپشىلارى Zakon.kz, Khabar, 24.kz, Atameken Business, Kapital.kz, Forbes.kz, LSM.kz, «ليتەر»، «ايقىن»، Qaz365, 7kun.kz جانە باسقا دا جەتەكشى مەدياعا 30-دان استام پىكىر بەردى. ماتەريالدار ەكونوميكا، قارجى، شوب، ۋربانيستيكا، ەكولوگيا، الەۋمەتتىك ماسەلەلەر، حالىقارالىق پروتسەستەر جانە تسيفرلاندىرۋ تاقىرىپتارىن قامتىدى. بۇل — دەربەس ساراپتاماعا دەگەن قوعامدىق سۇرانىستىڭ ارتقانىن كورسەتەدى.
العاشقى لەك فيناليستەرى رەتىندە اللا كيسلوۆا (حالىقارالىق قاتىناستار), ايگەريم يلياسوۆا (قارجى جانە ەكونوميكا), لاۋرا اۋتەلەەۆا (ازىق-تۇلىك قاۋىپسىزدىگى), ديليارا سەيتنۋروۆا (قۇرىلىس) جانە راۋشان تاسشوينوۆا (قارجى جانە سالىق) انىقتالدى.
ۇيىمداستىرۋشىلار العاشقى لەگىنىڭ ناتيجەلەرى ساراپشىلاردى جۇيەلى تۇردە دايىنداۋدىڭ قاجەتتىلىگىن دالەلدەگەنىن اتاپ ءوتتى. الداعى ۋاقىتتا باعدارلاما كەڭەيىپ، باعىتتار سانى مەن پراكتيكالىق فورماتتار ارتادى. قاتىسۋشىلار ءوزارا بايلانىستا بولىپ، Qazaq Expert Club كاسىبي قاۋىمداستىعىن دامىتۋعا دايىن ەكەنىن ءبىلدىردى.
