قازاقستاندا تۇركيا، اقش جانە تاعى بىرنەشە ەلدەردىڭ قاتىسۋىمەن جۇمىس ىستەيتىن كومپانيالار سانى قىسقارۋ ءۇردىسىن جالعاستىرۋدا. دەگەنمەن جالپى شەتەلدىك كاپيتالمەن جۇمىس ىستەيتىن ۇيىمدار سانى ءوسىپ كەلەدى، دەپ حابارلايدى "ادىرنا" پورتالى LS اگەنتتىگىنە سىلتەمە جاساپ.
1 قاراشاداعى دەرەكتەر بويىنشا، 15 ءىرى ينۆەستوردىڭ توعىزى قازاقستانداعى كاسىپورىندارىن جابۋدا.
قازاقستاندا جالپى 45,9 مىڭ شەتەلدىك كومپانيا جۇمىس ىستەيدى — بۇل وتكەن جىلمەن سالىستىرعاندا 3,8%-عا كوپ. ءوسۋ نەگىزىنەن شاعىن كاسىپورىنداردىڭ ەسەبىنەن (+4%), سونىمەن قاتار ورتاشا (+1,7%) جانە ءىرى كومپانيالاردىڭ ازداپ ءوسۋى (+2,2%) ارقاسىندا قامتاماسىز ەتىلدى.
الايدا ەلدەر بويىنشا ديناميكا اركەلكى. ەڭ ايقىن قىسقارۋ رەسەيلىك كومپانيالاردا بايقالادى . ولاردىڭ سانى 1,5 مىڭعا ازايعان (-8%), دەگەنمەن رەسەي قازاقستانداعى تىركەلگەن كاسىپورىندار سانى بويىنشا ءالى دە الدا كەلەدى.
سونداي-اق كومپانيالار سانى ازايدى:
- تۇركيا قاتىسۋىمەن — 247 (-6,8%);
- قىرعىزستان قاتىسۋىمەن — 205 (-9,2%);
- ۋكراينا قاتىسۋىمەن — 96 (-9,6%);
- اۋعانستان قاتىسۋىمەن — 79 (-15%);
- وڭتۇستىك كورەيا قاتىسۋىمەن — 42 (-6,8%);
- بەلارۋس قاتىسۋىمەن — 38 (-4,9%);
- اقش قاتىسۋىمەن — 23 (-4,7%);
- نيدەرلاندى قاتىسۋىمەن — 14 (-2,8%).
وسى ۋاقىتتا قىتاي مەن وزبەكستان كومپانيالارى سانى ءوسىپ كەلەدى: قىتايلىق كومپانيالار 1,6 ەسە كوبەيگەن، وزبەك كومپانيالارى 1,5 ەسە ارتقان.
سالالىق تالداۋ كورسەتكەندەي، ەڭ كوپ قىسقارۋ اقپارات جانە بايلانىس سالاسىندا بولدى. بۇل سالادا 3,2 مىڭ شەتەلدىك كومپانيا جۇمىس ىستەيدى (-5,8%). اكىمشىلىك جانە قوسالقى قىزمەتتەر سالاسىندا 2,3 مىڭ كومپانيا بار (-7,6%), ال كاسىبي، عىلىمي جانە تەحنيكالىق قىزمەت سالاسىندا 3,2 مىڭ كومپانيا (-2,2%).
ەڭ كوپ شەتەلدىك كومپانيالار ساۋدا سالاسىندا جۇمىس ىستەيدى — 16,1 مىڭ (+2,5%).
ايماقتار بويىنشا ليدەرلىكتى الماتى مەن استانا ساقتاپ وتىر: وندا سايكەسىنشە 21,8 مىڭ جانە 9,2 مىڭ شەتەلدىك كومپانيا جۇمىس ىستەيدى. ال جامبىل وبلىسىندا كومپانيالار سانى قاتتى قىسقارعان — 363 كاسىپورىن (-23%). ماڭعىستاۋ وبلىسىندا، كەرىسىنشە، ءوسىم جوعارى: كومپانيالار سانى ەكى ەسەگە دەيىن ارتقان، 2,8 مىڭعا جەتكەن.
