رەسەي كوممۋنيستىك پارتياسى يوسيف ءستاليننىڭ جەكە باسقا تابىنۋىن ايىپتاعان نيكيتا حرۋششەۆتىڭ بايانداماسىن قاتە دەپ تانىدى، دەپ حابارلايدى "ادىرنا" ۇلتتىق پورتالى ريا نوۆوستيگە سىلتەمە جاساپ.
ماسكەۋ وبلىسىندا وتكەن سەزدە قابىلدانعان قاراردا حرۋششەۆتىڭ حح پارتيا سەزىندە جاساعان «جەكە باسقا تابىنۋ جانە ونىڭ سالدارى» اتتى بايانداماسى «قاتە جانە ساياسي تۇرعىدان بىرجاقتى» دەپ سيپاتتالعان. بۇعان دەيىن «ينتەرفاكس» اگەنتتىگى قارار جوباسىنىڭ ءماتىنىن جاريالاپ، ونىڭ ستالينگە قاتىستى تاريحي ادىلدىكتى قالپىنا كەلتىرۋگە باعىتتالعانىن جازعان بولاتىن.
جوبادا: «حرۋششەۆتىڭ بايانداماسى شىندىققا جاناسپايتىن دەرەكتەر مەن ي.ۆ. ستالينگە قارسى جالعان ايىپتاۋلارعا تولى. وندا ءستاليننىڭ مەملەكەتتىك جانە پارتيالىق قىزمەتى تۋرالى اقيقات بۇرمالانعان»، – دەلىنگەن.
كوممۋنيستەر رەسەي پرەزيدەنتى ۆلاديمير پۋتينگە ۆولگوگراد قالاسى مەن ۆولگوگراد وبلىسىنا بۇرىنعى اتاۋىن — “ستالينگراد” پەن “ستالينگراد وبلىسى” — قايتارۋ تۋرالى ۇسىنىس جولدايتىنىن مالىمدەدى.
سوڭعى جىلدارى رەسەيدىڭ ونداعان قالاسىندا ستالينگە ارنالعان ەسكەرتكىشتەر
1956 جىلى 25 اقپاندا نيكيتا حرۋششەۆ كوكپ حح سەزىنىڭ جابىق وتىرىسىندا «جەكە باسقا تابىنۋ جانە ونىڭ سالدارى» اتتى تاريحي بايانداماسىمەن شىققان بولاتىن. وندا ستالين رەجيمىنىڭ بىرقاتار قىلمىستارى اتاپ كورسەتىلىپ، ولار ءبىر ادامنىڭ بيلىكتى اسىرا پايدالانۋىنان تۋىنداعانى ايتىلدى.
باياندامادان كەيىن گۋلاگ لاگەرلەرىنەن ميلليونداعان ساياسي تۇتقىن بوساتىلدى، ال ءستاليننىڭ جەكە تۇلعاسىنا تابىنۋ پروتسەسى السىرەي باستادى. بىراق بۇل ءۇردىس ناقتى تۇردە 1961 جىلى وتكەن XXII سەزدەن كەيىن كۇشەيىپ، سول كەزدە ءستاليننىڭ دەنەسى لەنين ماۆزولەيىنەن الىنىپ، ونىڭ ەسىمى قالالار مەن كوشەلەر اتاۋلارىنان الىنىپ تاستالدى، ەسكەرتكىشتەرى بۇزىلدى.