Nur-Sultan qalasynyń oqýshysy Rasýl Jumabekov patshaıym II Elızavetadan hat aldy. Konvertte 16 jastaǵy jasóspirimniń 2020 jyldyń sońynda jibergen hatyna jaýap jazylǵan, - dep habarlaıdy "Adyrna" ulttyq portaly Tengrinews.kz saıtyna silteme jasap.
Rasýl aldymen patsha otbasynyń tarıhyna qyzyǵa bastaǵan. Keıin patshaıymǵa hat jazýdy uıǵarǵan.
«Internette bir vıdeony kórip qaldym, onda rolık avtoryna patshaıym Elızaveta II-den hat keledi. Osydan keıin men de ózim týraly, qazaqstandyq oqýshy ekenimdi aıtyp, hat jazýǵa bel býdym. Qazaq ulttyq horeografııa akademııasynda baletpen aınalysatynymdy, sondaı-aq, fýtbol, fortepıanoda oınaýǵa qyzyǵatynymdy jazdym. Hatta patshaıymnyń densaýlyǵyn surap, oǵan bar jaqsylyqty tiledim», - deıdi Rasýl Jumabekov.
Ol Ulybrıtanııa jáne Soltústik Irlandııa patshaıymy II Elızavetaǵa hatty 2020 jyldyń qazanynda jibergen, biraq jaýap kútpegenin aıtady. Ony joldaǵannan keıin baqylaý múmkin bolmaǵan soń, Rasýl konvert joǵalyp ketkenine senimdi bolǵan.
«Maǵan jaýap 6 qańtarda keldi. Patshaıymnyń qoly qoıylǵan jaýaphatta ol meniń hatyma óte rıza bolǵanyn, jaǵdaıy jaqsy ekenin aıtyp, maǵan alǵys bildirdi. Osy qıyn-qystaý kezeńde maǵan jáne týǵan-týystaryma jaqsylyq tiledi», - dedi Rasýl.
