Almaty qalalyq bilim basqarmasy men Sh.Ýálıhanov atyndaǵy jeke menshik mektebi uıymdastyrǵan «KAZAKHSTAN International Robotics Competition» halyqaralyq robototehnıka baıqaýynda Taldyqorǵan qalasyndaǵy Nazarbaev Zııatkerlik mektebiniń oqýshylary Gran-prıdi jeńip aldy. Robototehnıka baıqaýy onlaın formatta ótti, oǵan Reseı, Japonııa, Túrkııa, Ózbekstan, Tájikstan jáne Qazaqstan komandalary qatysty.
Nazarbaev Zııatkerlik mektebiniń robototehnıka komandasy ádilqazylar alqasyna eki robotty usyndy: «Kishi sanat» bóliminde «Qoqysty suryptaý robotyn» 8- synyp oqýshylary Arýjan Mamyrova men Amına Qaıratqyzy tanystyrdy.
Joba avtorlarynyń zertteýi boıynsha adamzat jyl saıyn 2 mıllıard tonnadan astam turmystyq qatty qaldyqtardy shyǵarady eken. «Nege barlyq qoqystar qaıta óńdelmeıdi?» degen suraqqa zııatker oqýshylar jaýap tapty. Qaldyqtardy az mólsherde qaıta óńdeýdiń basty sebebi - qaldyqtardy suryptaýdyń bastapqy proesiniń kúrdeliligi.
Bul máseleni sheshý úshin ázirleýshiler qoqystyń fızıkalyq qasıetterine negizdelgen, birneshe robottandyrylǵan júıelerden turatyn qoqysty suryptaýǵa arnalǵan konveıerli jeli jobasyn usynyp otyr, olardyń árqaısysy tek óziniń qoqys túrin tańdap, arnaıy qoraptarǵa jınaıdy.
Dılnaz Jemisbek, Vıktor Kohno jáne Zııatkerlik mekteptiń túlegi Danııl Fılımonov aýmaqty qoqystardan tazartý máselesin sheshýge sál basqasha kózqaraspen keldi. Alty aıaqty robot ınjenerlik robot júıeleri sanatynda usynyldy. Bul jobanyń ereksheligi - ol joldyń boıymen ózdiginen qozǵalýǵa jáne qoqys jınaýǵa qabiletti. Sondaı-aq qoqysty quramy boıynsha ajyratyp jáne alǵashqy suryptaýdy jasaı alady. Robottyń baǵdarlanýy neırondyq jelilerge negizdelgen. Robottyn ár bólshegin oqýshylar 3D prınter arqyly basyp shyǵardy.
Taldyqorǵan qalasyndaǵy Nazarbaev Zııatkerlik mektebi oqýshylarynyń qurama komandasynyń qoqys jınaýshy robottary Halyqaralyq «KAZAKHSTAN International Robotics Competition» baıqaýynda joǵary baǵaǵa ıe bolyp, Gran-prıdi jeńip aldy!
