Atyraý qalasynyń úsh jasar turǵyny Dinmuhammed Jumajan Memleket basshysynyń alǵysyna ıe boldy, dep habarlaıdy “Adyrna” ulttyq portaly.
Oblys ákimi Serik Shápkenov búldirshin men onyń ata-anasymen kezdesip, QR Prezıdenti Ákimshiliginiń jetekshisi Aıbek Dádebaıdyń Prezıdent atynan joldaǵan hatyn tabystady.
Dinmuhammedtiń qaladaǵy Oraza aıt merekesinen keıingi tazalyq jumystaryna belsene qatysqany týraly vıdeo áleýmettik jelide keń taraǵan bolatyn. Bul áreketi arqyly ol kópshiliktiń yqylasyna bólendi.
Ákesi Erjan Haıroshevtiń aıtýynsha, ulynyń bul áreketi otbasynda tazalyq pen tártipke mán berýdiń nátıjesi. “Men óz ulymnyń eldiń patrıoty bolyp er jetkenin qalaımyn”, – deıdi ol.
Oblys ákimi Serik Shápkenov Dinmuhammedtiń tárbıesi men qorshaǵan ortaǵa degen súıispenshiligine rızashylyǵyn bildirip, onyń áreketi “Taza Qazaqstan” bastamasynyń mánin aıqyndaıtynyn atap ótti.
Kezdesý barysynda Dinmuhammedke estelik syılyqtar tabystalyp, ata-anasyna alǵys aıtyldy.
