Búgin Qyrǵyzstan prezıdenti Sadyr Japarov 41 sottalǵan adamǵa raqymshylyq jasaý týraly jarlyqqa qol qoıdy, dep habarlaıdy "Adyrna" ulttyq portaly 24.kg-ǵa silteme jasap.
Bul týraly Qyrǵyzstannyń jazalardy atqarý memlekettik qyzmeti málimdedi.
Raqymshylyqqa ilikkender arasynda azamattyq belsendiler de bar. Olardyń qatarynda – aqyn ári jýrnalıst Azamat Ishenbekov te bar. Ol 2024 jyly Temirov Live jáne «Aıt Aıt Dese» jobalaryna baılanysty ustalǵan. Jappaı tártipsizdikke shaqyrdy dep aıyptalyp, bes jylǵa bas bostandyǵynan aıyrylǵan edi.
Sonymen qatar, bloger Zarına Torokýlova da raqymshylyqqa ilikti. Ol 2023 jyly jazýshy Oljobaı Shakırdiń vıdeosyn áleýmettik jelide bóliskeni úshin ustalyp, bes jylǵa sottalǵan bolatyn.
Kaktus.media basylymyna bergen suhbatynda Torokýlovanyń qyzy Aıman anasynyń joǵarǵy sot Bishkek qalalyq sotynyń úkimin kúshinde qaldyrǵannan keıin raqymshylyq suraǵanyn aıtty. Ishenbekov te raqymshylyq týraly ótinish bergen. Bul jóninde onyń advokaty Sapar Akýn habarlaǵan.
Torokýlova men Ishenbekovtiń 9 sáýir kúni bostandyqqa shyǵady dep kútilýde.
Raqymshylyqqa ilikken ózge adamdardyń aty-jóni jarııalanǵan joq.
