Demoscope qoǵamdyq pikirdi jedel monıtorıngi bıýrosy júrgizgen saýalnama nátıjesinde Qazaqstan azamattarynyń 53,1%-y eldiń biryńǵaı ýaqyt beldeýine kóshýin qoldamaǵany anyqtaldy, dep habarlaıdy "Adyrna" ulttyq portaly QazTAG-qa siltep.
2024 jyldyń 27 qarashasy men 11 jeltoqsan aralyǵynda júrgizilgen saýalnamada azamattardyń osy reformaǵa qatysty pikiri men 2024 jylǵy basty oqıǵalarǵa baǵa berýi zerttelgen. Saýalnama nátıjesi boıynsha, biryńǵaı ýaqyt beldeýin qoldaıtyndar 22,1%-dy qurasa, 15,5%-y beıtarap ustanymda, al 7,4%-y bul ózgeris jaıly bilmeıtinderin aıtqan.
Respondentterdiń reformaǵa qatysty kózqarasy olardyń turatyn aımaǵyna baılanysty ózgergen. Shyǵys jáne ortalyq aımaqtarda – Abaı, Shyǵys Qazaqstan, Jetisý, Qaraǵandy, Ulytaý oblystarynda – turǵyndardyń basym kópshiligi (74,6%) biryńǵaı ýaqyt beldeýine qarsylyq bildirgen. Almatyda – 68,4%, Astanada – 55,7%, al ońtústik aımaqtarda (Shymkent, Almaty, Jambyl, Qyzylorda, Túrkistan oblystary) 47,8% bul sheshimge qarsy bolǵan. Soltústik aımaqtarda (Aqmola, Qostanaı, Pavlodar, Soltústik Qazaqstan oblystary) qarsy pikir bildirgender úlesi 45,3%-dy qurady.
Tek batys óńirlerde (Aqtóbe, Atyraý, Batys Qazaqstan, Mańǵystaý oblystary) reformany qoldaıtyndardyń úlesi azdap basym bolǵan – 31,8% qoldap, 30,6% qarsy shyqqan.
Azamattardyń eń úlken alańdaýshylyǵy tómen tabys deńgeıi (37,6%), azyq-túlik baǵasynyń ósýi (28,3%) jáne sybaılas jemqorlyq (26,8%) máselelerine baǵyttalǵan. Odan bólek, sý tasqyny, jer silkinisi máseleleri taǵy bar.
Demoscope zertteýi qazaqstandyqtardyń ómir súrý deńgeıi men áleýmettik máselelerge qatysty syn kózqarasynyń óskenin kórsetti.
