Senat tóraǵasy Máýlen Áshimbaev elimizdegi memlekettik qorlar qarajatynyń jumsalýyn baqylaý máselesin kóterip, máselelerdi aıtty, dep habarlaıdy "Adyrna" ulttyq portaly QazAqparatqa siltep.
«Búgingi tańda medıınalyq saqtandyrý, áleýmettik saqtandyrý qory, biryńǵaı jınaqtyq zeınetaqy qory jáne basqalary bar. Bul qorlardaǵy aktıvter el bıýdjetiniń barlyq shyǵysynan asyp túsedi. Búgin bizde bıýdjettiń shyǵys bóligi 24 trıllıon teńge bolsa, bul qorlardyń aktıvteri 25 trıllıon teńgeden asady. Iaǵnı, qorlarda úlken qarajat jınaqtalǵan. Endi bul quraldardy baqylaý jáne olardy paıdalaný máselesi týyndaıdy», - dedi M. Áshimbaev Senat otyrysynda.
Áshimbaev respýblıkalyq bıýdjettiń atqarylýy boıynsha esep berýde de qaıyrymdylyq qorlar bir ǵana paraqpen keletinin synǵa aldy.
«Onda shynymen ne bolyp jatqanyn túsiný óte qıyn. Bul jaǵdaıda Parlament bul shyǵyndardy baqylamaıdy, olarǵa qaramaıdy. Eńbek mınıstrliginiń bul qarajattyń qalaı jumsalyp jatqanyn qadaǵalaýǵa qanshalyqty múmkindigi bar ekenin bilmeımin. Jalpy, bul óte mańyzdy másele. Onda úlken qarajat jatyr. Biz qazir respýblıkalyq bıýdjetti qarap, jylý energetıkasy jáne basqa da baǵyttarǵa qarajat taba almaı otyrmyz. Al onda úlken qarajat jınaqtalǵan, endigi másele – olardyń baqylaýda bolýy jáne jalpyulttyq maqsattarda paıdalaný», - dedi M. Áshimbaev.
Máýlen Áshimbaev osy baǵytta Úkimet baqylaýy úshin qandaı da bir sharalardy qabyldaý qajettigin jetkizdi.
«Eger bizde ekonomıkanyń naqty sektoryn damytý mindeti bolsa, onda bul qarajattyń bóligi túrli qarjy quraldary arqyly ekonomıkanyń naqty sektoryn damytý úshin jumys isteýi kerek degendi bildiredi. Muny qalaı jasaý kerektigi – Úkimettiń qarjylyq jáne ekonomıkalyq blogynyń, áleýmettik qorǵaý mınıstrliginiń mindeti. Bıyl respýblıkalyq bıýdjettiń atqarylýyn qarastyrý kezinde bul máselege qaıta oralý qajet», - dedi Máýlen Áshimbaev.
