Áleýmettik jeli betinde «Jazýshylar odaǵynyń Astana qalasy fılaly taratylyp, onyń basshysy Dáýletkereı Kápuly qyzmetten alynady» degen postar jıi tarady. Sodan beri 3 kún ótkende Qazaqstan Jazýshylar odaǵynyń tóraǵasy Mereke Qulkenov Dáýletkereıdi ornynan alý týraly áńgime bolmaǵanyn endi aıtty, dep habarlaıdy “Adyrna” ulttyq portaly.
“Jas Alash” gazetine bergen suhbatynda Mereke Qulkenov Dáýletkereı Kápulynyń qyzmetinen alý týraly aqparat jalǵan ekenin aıtady.
«Dáýletkereıdi ornynan alý týraly áńgime bolǵan joq. Bul ótirik áńgime. Dáýletkereı jumysyn istep otyr. Ony jumystan ketirý týraly eshqandaı buıryq shyqqan joq. Endi hat týraly aıtaıyn. D.Ábdikuly, Q.Salǵarauly, Q.Jıenbaı, S.Ábdirahmanov qatarly qalamgerler bir hat jazyp qol qoıypty, biraq ol hat esh jerde jarııalanǵan joq, meniń qolymda. Osy hatta odaqtyń tutastyǵyn saqtaýymyz kerek degen ǵana oı aıtylǵan. Osyǵan deıin bireýler byqsyp, «Astanadan bir Jazýshylar odaǵyn ashsaq» dep áleýmettik jelilerde jazba jazǵan bolatyn. Árıne, mundaı pikirdi olar tikeleı aıtpasa da, jazba astynda bireýlerge sondaı pikir jazdyryp otyrǵany baıqalady”, deıdi Mereke Qulkenov.
Sondaı-aq, oblystyq fılıaldardy jabý týraly sybysqa da jaýap berdi.
«Oblystyq fılıaldardy jaýyp, onyń ornyn ókildikke aýystyrý týraly da aıtylyp jatyr. Muny da túsindire keteıin. Osyǵan deıin óńirlerde odaqtyń fılıaldary boldy. Olar odaqtyń atynan quzyretti oryndarǵa «mynany istep ber» dep hat jazatyn. Sóıtedi de, olar barlyq qarjyny ózderiniń jeke JK-syna aýdartyp alady. Men odaq basshylyǵyna kelgeli fılıaldardan odaqqa bir tıyn aqsha túsken joq. Negizi fılıaldar jergilikti jerde bizdiń jaǵdaıymyzdy jasaý kerek qoı, biraq olaı bolmaı tur. Sondyqtan men ony ókiletti qylyp, jumystar odaqtyń sheshimimen jasalsa degen oı bolatyn. Qazir qaıtadan oılanyp otyrmyz, múmkin basqasha jasaıtyn shyǵarmyz. Negizi fılıal da, ókildik te odaq úshin, odaqtyń abyroıy úshin, odaqtyń qarjysyn kóbeıtý úshin jumys jasaý kerek. Áıtpese, ony nege qurdyq.
«Fılıaldy jabýdy odaq tóraǵasy sheshe almaıdy, ol úshin sezd ótýi kerek» dep aıtylyp jatyr. Jarǵynyń 2, 7, 4-tarmaǵy negizinde fılıaldardy qurý týraly sheshim sezdiń quzyrynda degen sóz bar. Sonymen qatar Jarǵynyń 6-tarmaǵyna sáıkes qajetine qaraı Jazýshylar odaǵy ókildikterin, aýmaqtyq bólimshelerin qurýǵa quqyly degen de sóz bar. Kórdińiz be, bylaı da, bylaı da kelip tur. Osyǵan deıin Jarǵydaǵy jazylymǵa sáıkes eshqashan sezde fılıal qurý jóninde sheshim shyqpaǵan», – dedi M.Qulkenov.
