Jetisýdaǵy Qaratal aýdanynyń eń shalǵaı eldi mekeni – Kópbirlik aýylynyń turǵyndary sapaly aýyz sýǵa qol jetkizdi. Aýylda ortalyqtandyrylǵan sý qubyry bolǵanymen, sońǵy jyldary turǵyndar tuzdy sý ishýge májbúr bolǵan edi. Máseleniń qalaı sheshilgenin búgin oblys ákimi Beıbit Isabaev Qaratal aýdanyna barǵan jumys sapary barysynda arnaıy kórip qaıtty, dep habarlaıdy Jetisý oblys ákiminiń baspasóz qyzmeti.
Eske salsaq, 2010 jyly aýylda sýmen jabdyqtaý júıesi qaıta jańǵyrtylǵan edi, atap aıtqanda jańa jeliler salynyp, tereńdigi 100 metrden asatyn uńǵyma qazylyp, tuylandyrý qondyrǵysy ornatyldy, ysyrmalary aýystyryldy. Qabyldanǵan sharalarǵa qaramastan, sońǵy jyldary sýdyń tuzdylyǵy lıtrine 5,9 gramnan 8 gramǵa deıin ósken, sondyqtan bul aýyl halqyn mazalaǵan máselege aınalǵan bolatyn.
Osyǵan baılanysty oblys ákimi Beıbit Isabaevtyń tapsyrmasyna sáıkes bıýdjetten qarajat bólinip, máseleni sheshýge qajetti sharalar qabyldandy. Atap aıtqanda, 2 km jelige qaıta jańǵyrtý júrgizilip, jańa sý munarasy turǵyzyldy, oǵan qosa tuzdaný deńgeıi lıtrine tipti 12 grammǵa jetken kúnde de sýdy tuylandyrýǵa qýaty jetetin jańartylǵan tuylandyrý qondyrǵysy ornatyldy.
Oblys ákimi Kópbirlik aýylyna barǵan saparynda sýdyń sapasyn kórip, turǵyndarmen jolyqty. Osy oraıda kezdesýge qatysqan aýyl turǵyndarynyń biri Zámzágúl Nesipbaeva:
- Aýyz sý – tirshiliktiń negizi kózi, densaýlyqtyń kepili. Sondyqtan onyń sapasynyń jaqsy bolǵany mańyzdy. Bizde birneshe jyldan beri aýyz sý sapasy nashar bolatyn. Bıyl bul másele sizdiń qoldaýyńyzben sheshimin tapty, halyq rıza. Aýylymyzǵa budan bylaı da kóńil bólinedi dep senemiz, - dedi.
Atap ótsek, Kópbirlik aýylda 179 aýla bar, sonyń 168-i ortalyq sýmen jabdyqtaý júıesine qosylǵan. Aýylda turatyn halyq sany 900-den asady.
