Bolat aǵa ómirden ótti... Fototilshi Bolat. Sheber Bolat. Maıtalman Bolat. Baldaǵy altyn qurysh Bolat.
Altyn baldaǵy – qıyrdaǵyny shalatyn, kózdegenin qalt jibermeıtin, tóbesinen qus ushyrmaıtyn, baǵa jetpes fotoaaparaty. Qurysh degenimiz – sýret túsirý óneriniń shyńyna shyqqan Bolat aǵanyń sıpattamasy.
Óz kásibiniń qyr-syryn jetik ıgerip, shyn sheber ataný úshin eldiń zııalylary shoǵyrlanǵan ortalyq qalalardyń birinde turý shart emes. Sondaı-aq jalpaq jurtty eleń etkizetin erekshe sýret túsirý úshin fotomyltyǵyńnyń tumsyǵy tórt qarys, quny jaıynbas kólik satyp alýǵa jetetindeı tym qymbat bolýy da mindetti emes. Ol bireýde bar, bireýde joq qarapaıym fotoapparatymen-aq ǵalamat portretter men ǵajaıyp peızajdardy, ádemi kórinister men áserli etıýdterdi baspasóz tarıhynda qaldyrdy. Syr boıyndaǵy kóne qalanyń arǵy basy men bergi basynda tynymsyz shapqylap, sol óńirdiń ataqty aýdandary men alys aýyldaryn armansyz aralap júrip-aq, Almaty men Astana jaqtan anda-sanda shań berip qalatyn áıgili adamdardy nysanaǵa alyp, tanymal tulǵalar galereıasyn jasady.
Onyń ár kadry qundy boldy. Ózgeler sýret túsirdi. Ol sıýjet túsirdi. Ózgeler portret túsirdi. Ol portrettik ocherk túsirdi. Ózgeler shopannyń sýretin túsirdi. Ol shopan týraly shyǵarma túsirdi. Sonyń bárin bir-aq kadrǵa syıǵyzdy. Onyń shyrt etkizgeni shedevr bop shyǵady. Ol qazaq fotoónerine kórkemdik ákeldi. Ásemdik pen ádemilik darytty. Sen de, men de, ol da túsire alatyn jansyz sýretke belletrıstıkanyń júgin arqalatty. Mine, baldaǵy altyn qurysh Bolattyń baldaǵy bólek basqalardan aıyrmashylyǵy da osynda.
Onyń keıipkerleri sóılep turady. Shetinen minezdi. Shetinen shejireli. Shetinen qıqar. Shetinen sheshen. Sebebi, sýrettiń keıipkerleri sýrettiń avtoryna qatty uqsaıdy.
Men Bolat aǵa Omarálıevtiń biraz sýretin arqaý etip, birqatar maqala jazdym. Oıǵa alǵan biraz josparlarymyz barshylyq edi. Ómirdiń ózi keıde osylaı jospar-jobańa baǵynbaı ketedi eken ǵoı.
Kóbine-kóp kıno men televızııa álemine tesili «stop-kadr» degen uǵym bar. Eń sátti nemese eń qajetti bir kadrdy tańdap alyp, osynyń tóńireginde oı tolǵaısyń. Nemese sonyń aınalasynan másele týyndatasyń. Osy «stop-kadr» uǵymy áıgili fototilshi Bolat Omarálıevtiń de shyǵarmashylyq tabıǵatyn tap basatyn. Qaraýylǵa alǵanyn múlt jibermeıtin ol Seıdahmet Berdiqulov aǵamyz aıtqandaı, jumyr jerdi kindiginen ustap, solqyldatyp tartyp turyp, týlap jatqan tirshilikti lezde toqtatyp tastaı alatyn. Eń ádemi, eń áserli degen mezetti ańdyp turyp, qas-qaǵym sátte qaǵyp túsiretin. Jurttyń kózine iline bermeıtin qaltarystaǵy oljany alystan ańǵaryp, jan balasyna bildirmeı qaqshyp ala qoıatyn.
Osyndaı teńdessiz sheber bolǵanyna qaramastan Bolat aǵanyń sońynan shákirt ermedi. Eretindeı de múmkindik týmady. Ol úshin keıingi balalar Bolat aǵanyń ózi sekildi qysta qar keship, jazda jantaq jastanyp, jańbyrǵa jýynyp júre beretin jankeshti bolýy qajet edi. Sondyqtan ol únemi Syr boıyndaǵy qalyń qamys arasynda qalyp qoıǵan sol baıaǵy jotaly jolbarys qusap jalǵyz jortty. Jalǵyz júrip-aq jarty álemge tanyldy.
Mine, endi Bolat aǵamyzdyń sońǵy saǵaty soqty... Talaıdy tamsandyrǵan «stop-kadr» osylaı toqtady. Ádette «stop-kadr» paıdalanylyp bolǵan soń jybyr-jybyr etip, qaıta jalǵasatyn. Qozǵalysyn kilt tejep, birden siresip qatyp qalǵan beınege qaıyra jan bitetin. Al bul «stop-kadrdyń» toqtaǵany toqtaǵan endi... Maestro máńgilik mekenine ketip barady... Baqul bolyńyz, aǵa!
