Belarýs prezıdenti Aleksandr Lýkashenkonyń málimdemesinen keıin Qazaqstannyń Syrtqy ister mınıstrligi (SIM) Belarýs Elshisi Pavel Ýtıýpındi shaqyrtyp, oǵan Prezıdent Qasym-Jomart Toqaevtyń syrtqy saıası baǵytynyń tıimdiligin túsindirdi, dep habarlaıdy "Adyrna" ulttyq portaly.
Mınıstr Qazaqstannyń BUU Jarǵysyna jáne halyqaralyq quqyqtyń negizin qalaýshy normalaryna sáıkes teńgerimdi jáne beıbit syrtqy saıasat júrgizip jatqanyn atap ótti. Sonymen birge elimizdiń memleketter arasyndaǵy barlyq kelispeýshilikti saıası jáne dıplomatııalyq joldarmen sheshýdi durys sanaıtynyn jetkizgen.
«Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileýdiń Belarýs Respýblıkasynyń Elshisi Pavel Ýtıýpınmen kezdesýi barysynda Qazaqstan-Belarýs ekijaqty deńgeıdegi, sondaı-aq kópjaqty uıymdar sheńberindegi yntymaqtastyqtyń ózekti máseleleri talqylandy. Atap aıtqanda, Mınıstr Qazaqstan BUU Jarǵysyna jáne halyqaralyq quqyqtyń negizin qalaýshy normalaryna sáıkes teńgerimdi jáne beıbitshil syrtqy saıasat júrgizip jatqanyn erekshe atap ótti. Elimiz memleketter arasyndaǵy barlyq kelispeýshilikter saıası jáne dıplomatııalyq joldarmen sheshilýi tıis ekenine nyq senimdi. Qazirgi geosaıası jaǵdaıda Memleket basshysy júrgizip jatqan elimizdiń syrtqy saıası baǵyty óziniń tıimdiligin kórsetti" delingen mınıstrlik málimdemesinde.
Aıta ketsek, birneshe kún buryn Belarýs prezıdenti Aleksandr Lýkashenko «Rossııa» telearnasyna bergen suhbatynda postkeńestik keńistiktegi keıbir elderdi Reseıge «tutynýshylyq kózqaras ustanady» dep aıyptady.
Ol Reseı mene Belarýstiń bir qaıyqta otyrǵanyn aıtqan.
«Eger qaıyq aýdarylyp ketse, Reseı de, Belarýs te sýǵa batyp ketedi. Biz keıbir postkeńestik memleketterimiz sııaqty ábigerge túsip jatqan joqpyz. Olar Reseıden birdeńe alǵylary keledi, biraq ornyna eshteńe bermeıdi», – dep synady Lýkashenko.
