Ispanııalyq shabýylshy Karlıtos elordalyq klýbtyń jattyqtyrýshylar shtabymen janjaldasyp, “Astanadan” ketti, dep habarlaıdy “Adyrna” ulttyq portaly Vesti.kz saıtyna silteme jasap.
Buǵan deıin resmı aqparattar boıynsha, klýb 33 jastaǵy sportshysynyń merziminen buryn ketýin Qazaqstandaǵy qıyn beıimdelý nátıjesinde túsindirdi. Alaıda jaǵdaıǵa jaqyn derekkózdiń aıtýynsha, Karlıtos bapkerlermen, atap aıtqanda Grıgorıı Babaıanmen til tabyspaǵan.
Málimetke sáıkes, grekııalyq “Lamııadan” aýysqan shabýylshy ymyraǵa kelmeı, «Astanadan» ketýge bel býdy. Ol komanda sabynda úsh kezdesý ótkizip, nátıjeli bolmady.
Aıta ketsek, Grekııa chempıonatynyń sońǵy maýsymynda shabýylshy Lamııa sabynda 21 match ótkizip, 10 gol soǵyp, bes nátıjeli pas berip, ulttyq deńgeıdegi komanda tarıhyndaǵy úzdik bombardır atandy.
Karlıtos sonymen qatar ıspandyq «Torrelıano», «Elche», «Ontenente», «Fýenlabrada», «Novelda», «Eldense» jáne «Vılıarreal B», reseılik «Petrotrest», kıprlik «Arıs», polıak «Vısla» (Krakov) jáne Legııa, BAÁ-den “Al-Vahda” jáne grek “Panatınaıkosynda” oınady.
