Ózbekstandaǵy Ferǵana qalasynyń turǵyny áleýmettik jelide el prezıdenti Shavkat Mırzııoevke til tıgizgeni úshin jeti jylǵa bas bostandyǵynan aıyryldy, dep habarlaıdy «Adyrna» tilshisi fergana.agency-ke silteme jasap.
Ol Facebook-te memleket basshysyna arnalǵan óleńder men túrli vıdeolardy jarııalǵan.
Basylym jyl basynan beri memleket basshysy pen onyń otbasy múshelerin el aldynda balaǵattady degen aıyppen kem degende on adamnyń sottalǵanyn jazdy.
Buǵan deıin halyqaralyq Human Rights Watch quqyq qorǵaý uıymy 2023 jyly Ózbekstanda adam quqyǵy jaǵdaıy nasharlaǵanyn málimdegen edi.
Eske salaıyq, 2021 jyly Ózbekstanda prezıdent tarapyna qorlaý nemese jala jabý deregine qatysty qylmystyq jaýapkershilik engizildi. Qylmystyq kodekstiń 158-babynyń 3-bóligi ("Ózbekstan Respýblıkasy prezıdentin jarııa túrde qorlaý nemese jala jabý, sol sııaqty baspasóz nemese ózge de buqaralyq aqparat quraldaryn, telekommýnıkaııa jelilerin nemese ınternetti paıdalaný") boıynsha úsh jylǵa deıin túzeý jumystaryna nemese eki jyldan bes jylǵa deıingi merzimge bas bostandyǵyn shekteý ne bes jylǵa deıingi merzimge bas bostandyǵynan aıyrý jazasy kózdelgen.
«Ózbekstan Respýblıkasy Prezıdenti qyzmetiniń negizgi kepildikteri týraly» Zańnyń 4-babyna sáıkes, prezıdenttiń ar-namysy men qadir-qasıetine nuqsan keltirýge jol berilmeıdi jáne ol zań boıynsha jaýapkershilikke tartylady.
