Fýtboldan Qazaqstan quramasy Ulttar lıgasy S joly boıynsha pleı-off satysy jartylaı fınalynda Grekııadan jeńildi. Osylaısha elimiz 2024 jylǵy Eýropa chempıonatynyń joldamasyna ilinbedi, dep habarlaıdy «Adyrna» tilshisi.
21 naýryz kúni Afına qalasynda ótken match 0:5 esebimen aıaqtaldy.
Grekııalyq fýtbolshylar oıyndy belsendi bastady. 9-mınýtta Anastasıos Bakasetas penaltıdi múltiksiz oryndap, óz quramasyn alǵa shyǵardy. 15-mınýtta Dımıtrıs Pelkas, 37-mınýtta Fotıs Ioannıdıs, 40-mınýtta Dımıtrıs Kýrbelıs esepti eseleı tústi.
Ekinshi taımda Qazaqstan quramasynyń oıynshysy Erkin Tapalov avtogol soǵyp, match Qazaqstan komandasynyń iri jeńilisimen aıaqtaldy.
Endi Grekııa quramasy Ulttar lıgasy S joly boıynsha pleı-off satysy fınalynda 26 naýryzda Grýzııamen oınaıdy. Sol kúni Lıýksembýrg pen Qazaqstan komandalary joldastyq kezdesý ótkizedi.