Áleýmettik jelide Shyǵys Qazaqstan oblysy Ulan aýdany Qasym Qaısenov aýylynda ornatylǵan shyrshanyń sýreti qyzý talqylanýda, dep habarlaıdy “Adyrna” ulttyq portaly
Qulaǵan butaqtary bar shyrsha kópshilik synyna qaldy. Pikir bildirýshiler buǵan qansha aqsha jumsalǵanyna jaýap berýdi talap etti.
"Shyrsha bıýdjet esebinen emes, tegin ornatyldy. Endi onyń ornyna jańa, jasandy shyrsha ákelemiz. Birden aıta ketý kerek, buǵan bıýdjetten aqsha qarastyrylmaǵan. Ulan qory bar. Biz sol qordyń qarajatyna jasandysyn ornatýymyz múmkin. Biraq ázirge belgisiz. Búgin eski shyrshany alyp tastadyq, erteń jańasyn qoıamyz", - dep jaýap berdi Ulan aýdany ákimdiginiń baspasóz qyzmeti.
Belgili bolǵandaı, shyrshanyń jergilikti turǵynnyń ótinishi boıynsha qazyp alynǵanyna kóp bolmaǵan. Aýyl turǵyny aýlasynda ósken shyrsha kún sáýlesin jaýyp turǵandyqtan alyp tastaýdy ótingen. Al ákimdik shyrshany qoqysqa tastamaı, qaıta otyrǵyzyp, jańa jylǵa sándeýdi jón kórgen.
"Bul shyrshany da tastamaımyz. Áli de óńdep, kóshirip, sońyna deıin bezendiremiz", - dep qosty Ulan aýdany ákimdiginiń baspasóz qyzmeti.
