Oqu-aǧartu ministrı Jūldyz Süleimenovanyŋ atyna qatysty taraǧan «ūjymdyq hat» qoǧamda qyzu talqylanyp jatyr. Osy mäselege bailanysty Mäjılıs deputaty Mūrat Äbenov qūjattyŋ şynaiylyǧy men taralu jolyna kümän keltırıp, ministrge qarsy ūiymdastyrylǧan aqparattyq nauqan boluy mümkın degen pıkır bıldırdı, dep habarlaidy “Adyrna”.
Deputattyŋ aituynşa, Prezident Äkımşılıgınen alynǧan mälımetke säikes, Aqordaǧa joldandy delıngen hat resmi türde tırkelmegen. Soǧan qaramastan, qūjat qysqa uaqyt ışınde äleumettık jelıler men bırqatar aqparat qūraldarynda keŋınen taralǧan.
«Prezident Äkımşılıgıne mūndai hat tüspegenı turaly aqparat aldym. Sonda Prezidentke jetpegen hat äleumettık jelıge qalai tarap kettı?» degen saual qoidy Äbenov.
Onyŋ sözınşe, ministrdıŋ jūmysyna syn aitu men qoǧamda oǧan qatysty ädeiı terıs közqaras qalyptastyru – ekı bölek mäsele. Sonymen qatar, hatqa qol qoidy delıngen keibır azamattardyŋ özderı būl qūjattyŋ avtory emes ekenın mälımdegenı aityldy. Osy jait deputattyŋ pıkırınşe, negızgı maqsattyŋ Prezidentke ündeu joldau emes, ministrdıŋ bedelıne nūqsan keltıru boluy mümkın ekenın körsetedı.
Äleumettık jelıde taraǧan hatta Jūldyz Süleimenovanyŋ bırqatar qyzmetkerlerdı jūmystan şettetkenı negızgı syn retınde körsetılgen. Alaida Mūrat Äbenov mūndai kadrlyq özgerısterdı qalypty basqaruşylyq üderıs dep baǧalaidy.
Onyŋ mälımetınşe, bılım beru jüiesınde şamamen bır millionǧa juyq adam eŋbek etedı. Onyŋ ışınde 600 myŋnan astamy mektepterde jūmys ısteidı. Balabaqşalar, kolledjder, qosymşa bılım beru ūiymdary men basqa da mekemelerdı esepke alǧanda, jarty jyldyŋ ışınde bırneşe ondaǧan qyzmetkerdıŋ auysuy qalypty jaǧdai sanalady.
Sondai-aq deputat tızımde körsetılgen bırneşe azamatpen jeke söileskenın aityp, olardyŋ köpşılıgı qyzmetten öz erkımen ketkenın jäne eşqandai qysym körmegenın jetkızgenın mälımdedı.
Mūrat Äbenovtıŋ pıkırınşe, ministrlıkke qatysty kadrlyq özgerısterdıŋ obektivtı sebepterı bar. Soŋǧy jyldary bılım salasynda türlı zaŋbūzuşylyqtar men mäselelerdıŋ köbeigenın atap ötken ol, Prezident Qasym-Jomart Toqaev Jūldyz Süleimenovany osy baǧyttaǧy jüielı reformalardy jüzege asyru üşın taǧaiyndaǧanyn aitty.
Deputattyŋ aituynşa, ministrlık jekemenşık mektepterdıŋ qyzmetın baqylaudy küşeitıp, zaŋsyz lisenziialardyŋ jolyn kesu baǧytynda naqty şaralar qabyldap keledı. Onyŋ paiymynşa, mūndai äreketter belgılı bır müddelı toptardyŋ qarsylyǧyn tudyruy mümkın.
«Jūldyz Süleimenova eŋbek jolyn mūǧalımdıkten bastap, mektep direktoryna deiın ösken, bılım beru salasyn jaqsy bıletın maman. Qazırgı qolǧa alynyp jatqan özgerıster būrynnan qalyptasqan keibır jüielerge äser etıp jatqandyqtan, türlı qarsylyqtardyŋ boluy zaŋdy», – dedı Mūrat Äbenov.
