Memleket basşysy Qasym-Jomart Toqaev «Türkıstan» gazetıne bergen sūhbatynda äskerdegı sarbazdar ölımı jaily sūraqqa jauap berdı, dep habarlaidy «Adyrna» tılşısı.
Aituynşa, äskeri boryşyn öteuge şaqyrylǧan sarbazdardyŋ jaraqat aluy men qaza boluyna qatysty oqiǧalar — örkeniettı elge jat, terıs ürdıs.
«Beibıt zamanda mūndai jaittar bolmauǧa tiıs. Būl turaly barlyq küştık qūrylym basşylarymen juyrda ötken keŋeste de aittym. Qorǧanys salasyna jauapty mekemenıŋ basşylyǧyn tärbie jūmysyn dūrys qadaǧalamai otyrǧany üşın synǧa aldym. Armiia jastarǧa qoldau körsetıp, olardy elımızdıŋ naǧyz azamaty retınde tärbielep şyǧaruy kerek. Komandirler äskeri qyzmetşılerge ülgı-önege boluǧa tiıs. Äskerde älımjettıkke, būzaqylyqqa, ruşyldyqqa, jerşıldıkke oryn joq, ondai jaittarǧa jol berılmeidı. Mūnyŋ bärın özım jeke qadaǧalap otyramyn»,-dedı memleket basşysy.
Prezident ahualdy tüzeu üşın şūǧyl şaralar qabyldau jönınde būiryq bergenın atap öttı.
«Degenmen, qaiǧyly oqiǧalar äskeri bölımşelerdıŋ bärınde bolyp jatpaǧanyn atap ötken jön. Tekseru jūmystary, jalpy, äskerdegı tärtıp qataŋ saqtalatynyn körsettı. Tanymaldyqqa ūmtylǧan keibır blogerler äskerdegı şynaiy ahualǧa müldem janaspaityn söz taratyp jür. Olar armiiany sarbazdar kün saiyn derlık qylmyskerlerdıŋ qūrbanyna ainalyp, qaza tabatyn jer retınde körsetkısı keledı.
Şyn mänınde, sarbaz bolu – özıŋdı damytu üşın tyŋ mümkındıkterge ie bolu degen söz. Äskeri boryşyn ötep qaitqan jastar joǧary oqu oryndary men kolledjderde tegın oqi alady.
Olar äskerde jürgende sūranysqa ie mamandyqtardy meŋgeredı. Kelısımşartpen jūmys ısteitın äskeri qyzmetşıler men ofiserler äleumettık jaǧynan barynşa qorǧalǧan»,-dedı ol.
Memleket basşysy Qaruly Küşterdı tehnologiialyq tūrǧydan jaŋǧyrtu jūmysy qarqyndy jürgızıle bastaǧanyn mälımdedı.
«Äskeri qyzmettıŋ abyroi-bedelın köteru jäne elımızdıŋ qorǧanys qabıletın arttyru – memlekettıŋ basty basymdyǧynyŋ bırı. Qaruly Küşterımızdı tehnologiialyq tūrǧydan jaŋǧyrtu jūmysy qarqyndy jürgızıle bastady. Byltyr Ūly Jeŋıstıŋ 80 jyldyǧyna orai ötkızılgen äskeri şerudı şeteldık saiasatkerler men äskeri qairatkerler joǧary baǧalady, būl ıs-şara armiiamyzdyŋ zamanaui qaru-jaraqpen jäne tehnikamen, sonyŋ ışınde Qazaqstanda jasalǧan önımdermen tolyq jabdyqtalǧanyn, sondai-aq, äskeri qyzmetşılerımızdıŋ daiyndyǧy öte jaqsy ekenın aiqyn körsettı. Äskeri bölımşelerımız el ışındegı jäne halyqaralyq deŋgeidegı jattyǧularda tamaşa nätijege jetıp jür. Qazaqstanda kolledjderden bastap universitetke deiıngı bılım jäne ǧylym mekemelerın tügel qamtityn ūlttyq äskeri mektep qalyptasty.
Juyrda Tarazdaǧy mamandandyrylǧan äskeri mektepke bardym. Onda äleumettık jaǧynan osal toptaǧy otbasylardan şyqqan balalar oqidy. Būl – jaqsy bastama. Men osy mektepke aty aŋyzǧa ainalǧan batyrymyz Bauyrjan Momyşūlynyŋ esımın beru turaly şeşım qabyldadym. Oblys ortalyǧynyŋ bärınde osyndai mektep aşu turaly tapsyrma berdım. Būl bılım mekemelerınde bükıl elımız maqtan tūtatyn sardarlar men generaldar tärbielenıp şyǧatynyna senımdımın»,-dep tolyqtyrdy prezident.
