KazTAG bas direktory Äset Mataev pen bas redaktor Ämır Qasenov Freedom Finance kompaniiasynyŋ şaǧymy negızınde qylmystyq ıske küdıktı dep tanyldy. Būl turaly QazTAG basylymy jazdy, dep habarlaidy “Adyrna”.
Kompaniia reseilık milliarder Timur Turlovqa tiesılı. Şaǧym QazTAG jariialaǧan materialdarda alaiaqtyq shemalardan japa şekkenderdıŋ sözderı keltırılgenıne bailanysty tüsken.
Advokattardyŋ aituynşa, Mataev pen Qasenov belgılengen räsımder saqtalmai, öz qatysuynsyz küdıktı dep tanylǧan. Redaksiia qylmystyq ıs jönınde 20 qaraşada ǧana bılgen, al ıs 18 tamyzda qozǧalǧan. Osy uaqyt aralyǧynda polisiia bırneşe saraptama jürgızıp, redaksiiany ol turaly habardar etpegen.
Advokat Erlan Mäkenov tergeu organdary QPK talaptaryn būzyp, saraptama taǧaiyndalǧany turaly redaksiiany der kezınde tanystyrmaǧanyn atap öttı. Onyŋ sözınşe, būl fakt hattamalarmen rastalǧan.
21 qaraşada tergeuşı Zamanbek Tazabekov advokatpen äŋgıme barysynda sūraqtardyŋ «joǧary jaqtaǧy adamdardan» kelıp jatqanyn baiqamai aityp qoiǧan. Al nege saraptamalar turaly qaulylar redaksiiaǧa uaqytynda berılmegenı sūralǧanda, ol: «Maǧan basşylyq solai tapsyrdy», — dep jauap bergen.
KazTAG redaksiiasy Freedom Finance-ke qatysty jariialanymdar jäbırlenuşılerdıŋ — Gülmira İsaeva, Janna Qaparova, Karina Gaifulinanyŋ jäne advokat Svetlana Oralbaevanyŋ sözderıne negızdelgenın aitty.
Jäbırlenuşıler 2025 jylǧy 3 säuırde redaksiiaǧa habarlasyp, basqa BAQ-ta da, memlekettık organdarda da öz dauystary estılmegenın jetkızgen. Olar öz uäjderın däleldeu üşın qūjattar men eOtinish talondaryn ūsynǧan. Freedom Finance kompaniiasynyŋ baspasöz qyzmetıne joldanǧan sūraulardyŋ barlyǧy jauapsyz qalǧan.
Redaksiia būl ıstı Qazaqstandaǧy aldaǧy sailaular aldynda baspasözge qysym körsetu äreketı dep baǧalaidy. Sonymen qatar KazTAG prezident äkımşılıgı äzırlegen delınetın «senımsız tūlǧalar tızımıne» sılteme jasaidy. Tızımde ondaǧan jurnalist, saiasattanuşy, qūqyq qorǧauşy jäne mädeniet qairatkerı bar.
KazTAG būrynǧy filial direktory Ruslan Käkenovpen bolǧan äŋgıme baiandamasyn jariialady. Onda Freedom Finance arqyly sanksiialardy ainalyp ötu maqsatynda Qazaqstan men Resei arasynda ondaǧan million dollar kölemınde qarajat audaru shemalary qoldanylǧany aitylǧan. Käkenov būl shema 2023 jyly ıske asqanyn mälımdegen.
KazTAG būl materialdy AQŞ jäne EO elşılıkterıne, sondai-aq ARRFR, Ūlttyq bank jäne Ūlttyq ekonomika ministrlıgıne joldaǧanyn habarlady.
Äset Mataev pen Ämır Qasenov Almaty polisiia departamentıne 9 jeltoqsan küngı 11:00 jäne 17:00-ge şaqyrylǧan.
