Қазақстанның Ұлттық ғылым академиясының құрамына кімдер қабылданады деген сұрақ ғалымдар арасында қызу талқылануда. Өткен кезеңдерде академиктер құрамында Нұрсұлтан Назарбаев, Талғат Мұсабаев, Тоқтар Әубәкіров және олигарх Серікжан Сейтжанов сияқты танымал тұлғалар болғаны белгілі. Осы ретте, олардың жаңа құрылатын академияға өтетін-өтпейтіні жайлы «Ұлттық ғылым академиясы» республикалық қоғамдық бірлестігінің президенті Мұрат Жұрынұлы пікір білдірді, деп хабарлайды "Адырна" ұлттық порталы Nege.kz-ке сілтеп.
Мұрат Жұрынұлының айтуынша, Нұрсұлтан Назарбаев, Талғат Мұсабаев, Тоқтар Әубәкіров және Серікжан Сейтжанов өздерінің ғылыми еңбектері үшін заңды түрде академик атағын алған. Бұл тұлғалар ғылым кандидаттары ретінде академик болып сайланған кезде, олардың атағы жоғары баға мен жабық дауыс беру арқылы бекітілген. Жұрынұлы атап өткеніндей, Назарбаевтың экономика ғылымдары саласындағы еңбектері өз алдына бөлек тақырып. Ол Мәскеуде ірі ғалымдардың алдында диссертация қорғап, «экономика ғылымдарының докторы» атағын алған. Оның Қазақстандағы нарықтық экономиканы құрудағы рөлі де жоғары бағаланған. Сондықтан Назарбаевтың академик атағына сайлануы заңды құбылыс деп есептеледі.
"Нұрсұлтан Назарбаевтың ғылым саласына жасаған еңбегін айтып берейін. Ол Мәскеуде ірі ғалымдардың алдында диссертация қорғап «экономика ғылымдарының докторы» атағын бірауыздан алды. Назарбаев – Қазақстанда нарықтық экономиканы құрған адам. Сондықтан ол кісінің академик болып сайлануы – заңды құбылыс. Тіпті, ол президент болмаса да, сол жұмыстары үшін академик болып сайланар еді. Ал оның президенттік қызметіне, басқа жағына ештеңе айта алмаймын, тек ғылыми тұрғыдан жұмысына баға бере аламын. Біреу білер, біреу білмес, Назарбаев Беларусь ғылым академиясының академигі, МГУ-дың профессоры. Бірақ ол кісі жаңа академияға өте ме, жоқ па, оны қазіргі академияның президенті Күрішбаев шешеді. Біздің академия ең соңғы жиналысын өткізді. Енді мен академияны басқармаймын", - деп жауап берген ғалым.
Қазақстанның Ұлттық ғылым академиясының тарихы 1946 жылдан бастау алады, ал оның алғашқы президенті Қаныш Сәтбаев болғаны белгілі. Сол уақыттарда ғалымдар елдің жерасты байлықтарын зерттеп, мұнай мен газ кен орындарын ашуға, металлургия үшін қажет минералдарды табуға үлкен үлес қосқан.
