Профессор Серік Мейірманов Жапонияның жетекші жоғары оқу орындарының бірі — Ritsumeikan Asia Pacific University (APU) университетінде вице-президент (проректор) қызметіне тағайындалды, деп хабарлайды "Адырна" ұлттық порталы.
Бұл туралы Қазақстан Республикасының Ғылым және жоғары білім министрлігі баспасөз қызметінің жетекшісі Олжас Беркінбаев өзінің Facebook парақшасында жазды.
«Бұл тағайындау маңызды оқиға. Алғаш рет Қазақстан азаматы Жапониядағы жоғары оқу орнының басшылығында осындай жоғары әрі жауапты лауазымды иеленіп отыр. Бұл факт профессор Мейірмановтың тек кәсіби және жеке қасиеттерінің жоғары бағаланғанын ғана емес, сонымен қатар Қазақстанның ғылыми және білім беру мектебінің халықаралық деңгейдегі танылуын көрсетеді», — деп жазды Беркінбаев.
APU университеті Беппу қаласында орналасқан. Вице-президент қызметіне тағайындалғанға дейін профессор Серік Мейрманов осы университетте үш жыл бойы академиялық мәселелер бойынша декан қызметін атқарған.
Мейірманов Қазақстанда медициналық білім алған, ал PhD дәрежесін Жапонияда қорғаған. Ол қазіргі уақытта Қазақстан Президентінің жанындағы Ғылым және технологиялар жөніндегі Ұлттық кеңестің мүшесі, сондай-ақ Ұлттық Ғылыми Кеңестің құрамында шетелдік сарапшы ретінде жұмыс істейді.
«Мен үшін бұл — үлкен құрмет және жауапкершілік. Сонымен қатар, мен Қазақстанды осындай деңгейде халықаралық академиялық қауымдастықта танытқаныммен мақтанамын және бұл тағайындау Жапония мен Қазақстан арасындағы ғылыми және білім беру байланыстарын нығайтуға қызмет етеді деп үміттенемін», — дейді профессор.
Мейірмановтың лауазымға ресми кіруі 2025 жылдың 1 сәуірінде өтті.
