Мьянмадағы зілзаладан қаза тапқандар саны 2886-ға жетті, деп хабарлайды "Адырна" ұлттық порталы.
Соныммен қатар, 4,5 мың адам жарақат алып, 370 адам хабар-ошарсыз кеткен.
Зардап шеккен аймақтарда Ресей, Қытай, Үндістан және Сингапурдан келген жедел құтқару топтарының қатысуымен іздестіру-құтқару жұмыстары жалғасуда. Құтқарушылар 100 сағаттан астам уақыт үйінді астында қалған адамдарды шығарып жатыр.
Мьянманың астанасы Нейпьидодағы қонақүй үйінділерінің астынан құтқарушылар бір адамды бес күннен кейін тірі алып шықты. Бұл туралы елдің өрт сөндіру басқармасы хабарлады.
Құтқарушылар оның нақты денсаулық жағдайы туралы ақпарат берген жоқ. Алайда таралған видеодан жас жігіттің айтарлықтай жарақат алмағанын байқауға болады. Құтқару жұмыстары жалғасып жатыр, бірақ аман қалғандарды табуға үміт азайып барады.
Еске сала кетсек, 28 наурызда Мьянма аумағында 7,7 магнитудалы жер сілкінісі болды. Соған байланысты елде бір апталық ұлттық аза тұту жарияланды. Жерасты дүмпулері Үндістан, Таиланд, Лаос және Қытайда да сезілген.
