Қытай – әлемде алғаш болып ұшатын таксилерді коммерциялық мақсатта пайдалануға ресми рұқсат берген ел атанды, деп хабарлайды "Адырна" ұлттық порталы South China Morning Post-ке сілтеп.
Қытайдың Азаматтық авиация басқармасы (CAAC) екі компанияға – EHang Holdings және Hefei Hey Airlines-ке пилотсыз ұшатын аппараттарды жолаушылар тасымалдау үшін қолдануға лицензия берді. Бұл рұқсат компанияларға қалалық экскурсиялар және басқа да әуе логистика қызметтерін көрсетуге мүмкіндік береді.
Қазіргі уақытта бұл нарықта ең озық аппарат – тік ұшатын EHang EH216-S дроны. Ол автоматты түрде бағытты белгілеп, навигация жасап, өздігінен ұшып-қона алады. Дегенмен, оның әуеде болу уақыты 25 минуттан аспайды, ал салоны небәрі екі адамға арналған.
Сондықтан жақын арада қала ішінде ұшатын таксилер кеңінен қолданысқа енеді деуге ерте. Қазірше бұл технология эксклюзивті қызмет түрі ретінде қарастырылып отыр.
Қытай билігі бұл саланы стратегиялық маңызды бағыттардың бірі деп танып, оған ерекше назар аударуда. Ұшатын таксилермен қатар, елде жүк дрондары, дирижабльдер мен аэромобильдерді дамытуға басымдық берілуде. Бұл салалар биотехнология, кванттық есептеу, жасанды интеллект және 6G мобильді желілерімен қатар басым бағыттар тізіміне енгізілген.
Айта кетейік, қала ішінде әуе көлігін пайдалану идеясы жаңа емес. 1958 жылы Кеңес Одағында Симферополь мен Ялта арасында тікұшақ бағыты іске қосылған. Бүгінде бұл бағытта әлем бойынша 300-ге жуық компания жұмыс істейді, ал Қытайдан бөлек, Германия, Жапония, Сингапур және БАӘ ұшатын такси саласында алдыңғы қатарда тұр.
