АҚШ сенатының 50 мүшесінен құралған топ Ресей Украинадағы бейбіт келісімнен бас тартқан жағдайда, оған қарсы жаңа санкциялар енгізуді көздейтін заң жобасын ұсынды, еп хабарлайды "Адырна" ұлттық порталы DW-ге сілтеме жасап.
Бұл туралы 1 сәуір күні, республикалық сенатор Линдси Грэм мен демократ сенатор Ричард Блюментальдің сайттарында жарияланған баспасөз хабарламасында айтылған.
"Бұл санкциялар Ресей Украинамен тұрақты бейбітшілік орнату туралы адал келіссөздер жүргізуден бас тартса немесе бейбіт келісім жасалғаннан кейін Украина егемендігіне қауіп төндіретін әскери басқыншылық сияқты өзге де әрекеттерге барса енгізіледі. Сондай-ақ, заң жобасы Ресейдің мұнайын, газын, уранын және басқа да өнімдерін сатып алатын елдерден импортталатын тауарларға 500% мөлшерінде баж салығын енгізуді көздейді", – делінген хабарламада.
"Сенатта Ресей – басқыншы мемлекет деген көзқарас басым. Бұл сұмдық соғысты және Путиннің агрессиясын дәл қазір тоқтату қажет. Сонымен қатар, болашақта да мұндай әрекеттерге жол бермеу керек. Біз Ресеймен бейбітшілік орнату мәселесінде президент Трамптың көңілі қалғанын түсінеміз және оның тұрақты, әділ әрі лайықты бейбітшілік орнату жөніндегі ұмтылысын қолдаймыз" – деп мәлімдеді Грэм мен Блюменталь.
"2025 жылы президент Трамп пен оның командасы бүкіл әлемнің қолынан келмеген нәрсені іске асырып, Ресейдің Украинаға қарсы агрессиясын түбегейлі тоқтатады және еркін, демократиялық Украинаның өміршеңдігін қамтамасыз етеді деп үміттенеміз", – деп түйіндеді сенаторлар.
Құжатқа сәйкес, бұл заң жобасының авторлары – 25 республикашыл, 24 демократ және бір тәуелсіз сенатор. Сонымен қатар, заң жобасын өкілдер палатасына енгізуге төрт конгрессмен (екі республикашыл және екі демократ) келіскен.
Грэм мен Блюменталь жаңа санкцияларды АҚШ Конгресінің қос палатасы қолдайтынына сенімді. Бұл санкциялар дайын және сенат пен өкілдер палатасында екі партияның да басым қолдауына ие болды.
Бұған дейін Грэм мен Блюменталь Ресейге қатысты бірнеше бірлескен заң жобасын ұсынған. 2022 жылғы қыркүйекте және 2024 жылғы маусымда олар Ресейді терроризмді демеуші мемлекет деп тануды ұсынды. Ал 2025 жылғы наурызда олар Ресейдің 300 миллиард доллардан астам мұздатылған активтерін тәркілеп, Украинаның пайдасына беруді талап етті. Алайда бұл бастамалардың ешқайсысы қабылданбады.
