Ақтөбеде оқушының автобус еденін жууға мәжбүр болғаны туралы ақпарат расталмады, деп хабарлайды "Адырна" ұлттық порталы.
Әлеуметтік желілерде №19 бағыттағы автобустың жүргізушісі билетсіз жүрген оқушыны салонды тазалауға мәжбүрлегені жөнінде ақпарат тараған болатын. Осыған байланысты қалалық тұрғын үй-коммуналдық шаруашылық бөлімі өкілдерінің қатысуымен комиссия құрылып, полиция тергеу жүргізді. Алайда тексеру нәтижесінде мұндай фактілердің расталмағаны белгілі болды.
"Ақтөбе қаласындағы № 19 бағыттағы автобустар "Автопарк" ЖШС-не тиесілі. Полиция осы шағым бойынша маршруттың жүргізушілеріне қатысты мұқият тергеу жүргізді. Тексеру нәтижесінде оқушының еден жууға мәжбүр болғандығы туралы ақпарат расталмады. Бұл ақпарат жалған. Автобус жүргізушілерінің міндеті — жолаушыны белгіленген аялдамаға қауіпсіз жеткізу", – деді Ақарыс Тілеулесов.
Бұған дейін Оқу-ағарту министрлігі оқиғаға құқықтық баға беру үшін Бас прокуратураның араласуын талап еткен еді. Бірақ жүргізілген тергеу бұл ақпараттың негізсіз екенін көрсетті.
