Мектептегі емші. Даудан кейін жауапты мамандар жұмыстан кетті

837
Adyrna.kz Telegram

Жамбыл облысында мұғалімдердің ақшасына шақыртылды делінген емшіні құрметпен қарсы алған Тұрар Рысқұлов ауданы Тереңөзек ауылындағы мектепте арнайы тексеріс жүргізілді, - деп хабарлайды “Адырна” ұлттық порталы.

Тексеру жұмыстарын Жамбыл облысының Балалардың құқықтарын қорғау жөніндегі уәкілі мен Жамбыл облысы әкімдігінің білім сапасын қамтамасыз ету департаментінің қызметкерлері жүргізді.

Білім, ақпарат және әлеуметтік даму басқармаларының қызметкерлерінен құралған жұмыс тобы да тексеру жұмыстарына қатысты.

Тексеру қорытындысы бойынша Тұрар Рысқұлов ауданы әкімінің орынбасары А.Терлікбаев мен Жамбыл атындағы мектеп директоры Е.Зәкімбаев өз өтініштері бойынша қызметінен босатылған.

Тұрар Рысқұлов аудандық ішкі саясат бөлімінің басшысы мен Тереңөзек кентінің әкіміне қатаң сөгіс түріндегі тәртіптік жаза қолданылған.

Еске салайық, бұған дейін желіде Тереңөзек ауылындағы орта мектепте өткен шарадан сәнді көйлек киіп, тәжге ұқсас бас киім киген әйел бейнеленген видео пайда болды. Оны мектепте кино жұлдызындай қарсы алған: адамдар жолдың екі жағына тізіліп, ал мектеп оқушылары оның көйлегін көтеріп жүрген. Басқа кадрларда сол әйелдің сыныпқа қалай кіргені және оның аяғына раушан гүлдерін тастап жатқаны көрсетілген.

Видеода Томирис патшайымының бейнесін сомдаған Гүлсара Көпбаева көрсетілгені атап өтілді. Ол бір кездері өзі бітірген мектепке қайырымдылық көмек көрсету үшін келген.

Қонақты лайықты қарсы алу үшін ұстаздардан төрт мың теңге жиналып, тіпті емшінің құрметіне концерт те ұйымдастырылғаны айтылды.

Пікірлер